Bya Stephen Kulubasi
Minisita omubeezi ow’obulimi, obulunzi n’obwegassi mu Bwakabaka bwa Buganda, Oweekitiibwa Hajji Hamis Kakomo, akubirizza abalimu n’abalunzi okweyunira enkola y’obwegassi kibasoboze okufuna mu bye bakola.
“Abalimi n’abalunzi mweyunire obwegassi musobole okufuna empeereza ennungi, akatale wamu n’okwanguyirwa mu bikozesebwa.” Owek. Kakomo bwe yagambye.
Bino Owek. Kakomo abyogeredde ku 
Masengere e Mmengo era n’abakubiriza abalimi okusiga mu kiseera kino naddala abo abamala okusambula ennimiro zaabwe nga beetegekera sizoni.
Ono yakinogaanyizza nti abantu kirungi beeweeyo okwettanira eby’obulimi kubanga omuntu bw’atalima talya era n’abasaba nti bwe baba balima ebirime ebikula amangu ng’enva endiirwa tebeerabira awamu n’ebyo ebitwala ebbanga okukula ng’emmwanyi kuba bivaamu ensimbi nnyingi.
Minisita Kakomo yakikkaatirizza nti abantu basaanidde okusooka okutunuulira akatale bwe kayimiridde nga tebannasalawo kye bagenda kulima, okusobola okwewala ebirime okubasala era bafeeyo ku mutindo gw’ensigo zebagula.
Wano we yasinzidde abalimi okuddukira eri ekitongole ky’Obwakabaka bwa Buganda ekikola ku bulimi n’obulunzi ekya BUCADEF, baweebwe amagezi ku ngeri gye bayinza okufuna ensigo ez’embala nga ziteerekeddwa bulungi ate nga nnamu.
Owek. Kakomo abalimi abasabye okweyambisa abalimisa BUCADEF beyaweereza mu masaza ga Buganda okusobola okulambika abalimi.
Minisita ategeezezza nti bano baweebwa n’ekkatala lya buli mulimisa okusomesayo banne 20 era nasaba abantu bakozese omukisa guno okuyiga n’okubebuuzaako basobole okugaziya enfuna yaabwe, olwo Buganda edde ku ntikko.
Owek. Kakomo abantu abakuutidde okukola ennyo n’okwettanira okulima basobole okumalawo ebbula ly’emirimu era kiyambeko okulaakulanya eggwanga.