Bya Gerald Mulindwa
Ttabamiruka w’Abakyala ba Buganda mu Scandinavia. Abakyala babanguddwa mu ntambuza y’Amaka n’emirimu egy’emikono.
Okubangula kuno kukoleddwa Ssentebe wa Ttabamiruka w’Abakyala mu Buganda, Dr. Sarah Nkonge Muwonge mu kibuga Stockholm ekya Sweden.
Dr. Nkonge awadde abakyala omusomo ku Maka amalungi, obulamu bw’Omukyaala, okuteekateeka Abakyala nebafuna obukugu mu mirimu egyenjawulo.
Omusomo gukulembeddwa alipoota ya “Pilot project” ey’essaza Scandinavia eyaweereddwa Muky. Janet Magato owa AfriSwed abakolagana n’essaza okuyamba abalimi okulima omuwemba.
Bano era balina enteekateeka okuyambako omulimi okufuna waalimira, okufuna ensigo, n’okutendekebwa era nebafuba okulaba nga omulimi oyo azzaayo ensimbi zebaamuteekamu nga amaze okufuna amakungula.
Ekigendererwa mu puloojekiti eno kwekusitula embeera z’abantu, n’okunyweza enkolagana y’Abakyala mu Ssaza Scandinavia n’Abakyaala ba Ttabamiruka wamu nokulaba engeri y’okwenyigira mu bikolebwa abakyala mu masaza.
Omusomo gwakubiriziddwa muky. Beatrice Kiwanuka atwala ekitongole ky’Abakyala n’abaana mu e Scandinavia.
Oluvannyuma lwa Ttabamiruka, wabaddewo okusiima abaweereza abaawummula okuli; Omuk. Rose Ntongo Mayanja ne Olivia Nankya olw’obuweereza bwabwe eri abantu ba Scandinavia n’Obuganda.
Atwala essaza Scandinavia, Owek. Nelson Mugenyi, mukwogera kwe yeebazizza nnyo abaweereza abo okwewayo okuweereza nga tebeebalirira, okwagala Obuganda wamu n’Okubeera abawulize eri Ssaabasajja Kabaka. Bawereddwa ebbaluwa ezibeebaza wamu n’ejjinja.
Basinzidde mu nsisinkana eno nebakuza olunaku lwa “Buganda Day” mu Scandinavia olukuzibwa buli mwaka.