Bya Ssemakula John
Kakeeka – Mmengo
Ettendekero lya Ssaabasajja Kabaka li Buganda Royal Institute of Business & Technical Education lijaguzza emyaka 25 bukya litandika mu 1999 okubangula abaana b’eggwanga mu masomo g’ebyemikono n’okubawa emirimu.
Omukolo guno guyindidde ku kitebe ky’ettendekero lino e Kakeeka Mmengo ku Lwokusatu era Nnaalinnya Sarah Kagere y’abadde omugenyi omukulu, atandise n’okulambula ebimu ku bintu ebikolebwa abayizi bano era naatendereza emirimu egikolebwa ettendekero lya Buganda Royal Institute okubangula abaana b’eggwanga mu mirimu gyemikono.
Nnaalinnya Kagere agumizza Obuganda ku mbeera y’Omutanda naakakasa nti kwali ku Nnamulondo ya bajjaajjabe alamula abantu be.
Akiikiridde Kamalabyonna ku mukolo guno Oweek. Christopher Bwanika ategeezezza nti ebijaguzo bino bituukidde mu kiseera ky’ebikujjuko by’Amatikkira ga Beene ag’emyaka 31 era Obwakabaka busanyufu olw’ettendekero lino okutuuka ku kkula lino nga litendeka abaana b’Eggwanga.
Ye Minisita w’ Ebyenjigiriza ebyawaggulu, John Chrysestom Muyingo ng’ono yaliko Minisita w’Ebyenjigiriza mu Bwakabaka, agamba ettendekero lino kirabo Beene kyeyawaayo eri abaana ba Buganda ne Uganda okufuna okubangula abaana mu byemikono ekigenda okumalawo nebbula lyemirimu
Owek. Muyingo ategeezezza nti gavumenti neteefuteefu okukwasizaako gavumenti ya Ssaabasajja mu byenjigiriza omuli ne mu byemikono okusobozesa abaana okukuguka baleme kunoonya mirimu basobole okugyetandikirawo.
