Bya Ssemakula John
Gomba
Minisita Omubezi owa gavumenti ezeebitundu mu Buganda era avunaanyizibwa ku nsonga z’abantu ba Kabaka ab’ebweru wa Buganda, Owek Joseph Kawuki akuutidde bannaddiini obuteesamba buweereza mu Bwakabaka nga beekwasa eddiini.
Owek Joseph Kawuki okwogera bino yabadde yeetabye mu kusaba okw’enjawulo ku Lutikko e Kasaka mu disitulikiti y’e Gomba okwakulembeddwamu Rev Canon David Kalebu nga batikkira abaweereza ba Katonda abaafunye Obwawule n’Obudyankoni.
“Katonda akuyita nga bw’oli naye abantu bangi bwe batandika okuweereza bwa Mukama, oluusi baseesetuka ne bava ku mbeera gye balimu. Mu Bwakabaka tulina abantu bangi bannaddiini abaweereza Katonda. Temutya kuweereza buwangwa bwammwe, temutya kuweereza Kabaka wammwe.” Minisita Kawuki bwe yagambye.
Minisita Kawuki alambise abazadde ku nkuza y’abaana naddala ab’obulenzi mu kiseera kino eky’omuggalo kuba essira balitadde ku baana abawala ne beerabira abalenzi.
Mu kwogera kwe Omulabirizi wa Central Buganda, Micheal Lubowa yasabye gavumenti okwongera amaanyi mu kulwanyisa ebikolwa eby’ettemu ebiri mu bitundu by’eggwanga ebitali bimu.