Bya Kato paul
Lukaya – Buddu
Abakulembeze abalonde ku mitendera egy’enjawulo mu disitulikiti y’e Kalungu, bakukkulumidde abakozi ba gavumenti mu kitundu kino olw’okulemwa okubategeeza nti mirimu egikolebwa mu bitundu byabwe ne balemwa okugirondoola.
Bano okutabuka babadde ku ssomero lya Lukaya Seed Secondary School nga balirambula eryazimbiddwa kkampuni ya MMACKS Investments Ltd ku nsimbi ezavudde mu World Bank ne gavumenti ya kuno erimaze ebbanga lya myaka 3 nga lizimbibwa, wabula nga n’okutuusa essaawa ya leero terinnaggwa.
Abakulembeze bano abakulembeddwamu Ssentebe wa disitulikiti, Nyombi Mukiibi Kamad, bagamba nti sseminti eyateereddwa mu bibiina wansi, yenna ajjudde enjatika kyokka nga n’ebisinga obungi tebinnakolebwa omuli okuteekamu ebyuma bikalimagezi era byonna bikakasa nti omulimu gwakolebwa mu ngeri mbi ddala.
Okusinziira ku Mmeeya wa Ttawuni kkanso ye Lukaya, Tamale Charles, emirimu mingi egikolebwa ku ssente z’abawi b’omusolo mu kitundu kino, girina okulondoolebwa naye abakulu balemwa okubategeezaako negimaliriza nga gikoleddwa mu ngeri ya gadibengalye.
Ku nsonga eno Ssentebe wa Kalungu, Nyombi Mukiibi Kamad, obuzibu
abutadde ku bakungu ba gavumenti abatafaayo kulondoola mirimu gino ku mitendera egy’enjawulo, ekivuddeko gavumenti okufiirwa ssente eziwerera ddala.
Ate ye omukulu mu kkampuni ya MMACKS Investments Ltd, Eng. Mutesase Richard, agamba nti ekizibu kivudde ku kuba nti ebintu bye balina okukozesa ebisinga biva bweru ate n’embeera y’omuggalo ebalemesezza okumala omulimu guno mu budde obwabaweebwa.
Akulira okulondoola emirimu gya gavumenti e Kalungu, RDC Caleb Tukaikiriza ategeezezza nti wadde aba MMACKS basabye bongerwe omwezi bamalirize okulimu guno, naye balina okukimanya nti ogulimu gulina okutuukana n’ensimbi ezabaweebwa okuzimba essomero lino.