Bya Ssemakula John
Katikkiro wa Buganda, Charles Peter Mayiga, ategeezezza nti obukulembeze bukulu nnyo ku buli kibeera kiruubirirwa era singa buteeka essira ku kulembeza abantu busobola bulungi okuleetawo essanyu n’enkulaakulana mu bantu.
Bino Kamalabyonna abyogedde atuuza Pulezidenti wa Rotary Club y’e Wobulenzi, Muky. Florence Nassanga Musoke ng’ayita ku mutimbagano gwa ZOOM ku Lwokuna.
“Abantu yonna gye tubeera ne bwezibeera ensi bakula, bazing’ama oba badda emabega nga basinziira ku mutindo gw’obukulembeze bwe bafuna oba bwe bagoberera. Rotary ebaddewo emyaka mingi era etutuusizza ku bintu ebirungi bingi kubanga obukulembeze bwe balina bunoonya abo abasinga okuba n’obusobozi.” Owek. Mayiga bw’agambye.
Owek. Mayiga asiimye obukulembeze bwa bwa Rotary olw’okusosowaza abantu mu buli kye bakola naddala nga batandikira ku bintu ng’ebyobulamu, amazzi, okuzzaawo obutonde bw’ensi wamu n’okudduukirira abantu ab’enjawulo.
Kamalabyonna alabudde ku muze gw’abantu okwagala okutandikira ku binene n’asaba bayigire ku Rotary kuba ebintu ebitono bye bakola bibatuusa ku buwanguzi era nga ne lwe bavuddeyo okukola ebintu ebinene nabyo babiggusa.
Ono asiimye Pulezidenti omuggya, Nassanga Musoke, olw’okubeera omukozi eri eklezia, Obwakabaka n’eggwanga era omumalirivu buli lwabaako kyasazeewo okukola.
Mu kwogera kwe, Pulezidenti wa Rotary Club y’e Wobulenzi omuggya, Nassanga Musoke aweze okwogera okutwala ekibiina kino mu maaso era n’asiima Kamalabyonna olw’okukkiriza ne yeetaba ku mukolo guno.
Omukolo guno gwetabiddwako Bisoopu Paul Ssemwogerere wamu n’abakungu ab’enjawulo, era nga gukuziddwa mu ngeri ya Ssayansi olw’ekirwadde kya Corona ekiwanise amatanga