Bya Noah Kintu
Ssembabule
Abalimi n’abalunzi e Ssembabule naddala mu ggombolola y’e Kawanda basomeseddwa ku ngeri okweggya mu bwavu nga balima mu nnima ey’omulembe, kibayambe okulwanyisa obwavu. Omusomo guno gukuliddwamu ssentebe wa disitulikiti y’e Lwengo, George Mutabaazi, Agnes Kabwiiso wamu n’abakugu abalala okuva mu Agro Farming.
Omukugu Agnes Kabwiiso abalaze engeri gye balina okulimamu nga bakozesa eddagala wamu n’okulimira awafunda. Abamu ku bavubuka abeetabye mu musomo guno beemulugunyizza ku bbeeyi y’ebikozesebwa okulima oguli waggulu ate nga n’ebbeeyi y’emmwanyi ekyali wansi nnyo.
“Obuzibu bwe tulina z’ensimbi ezigula ebigimusa kuba bya bbeeyi nnyo ate nga yo ebbeeyi y’emmwanyi si nnungi n’akamu. Tusaba Gavumenti eteekewo akatale akalungi, kituyambe okwekulaakulanya.” Omu ku bavubuka Zziwa Emmanuel bwe yagambye.
Kkansala w’abavubuka mu ggombolola eno, Namanya George, yategeezezza nti omusomo gugenderedde kukyusa ndowooza z’abavubuka basobole okuva mu mbeera zedda, bakole ebibayamba bakyuse obulamu.
Ssentebe George Mutabaazi yalaze nti batambude ebitundu ebiwerako okulaba ng’abantu bakyusa embeera zaabwe naddala mu by’ennima era nga byonna babitambuliza wamu n’ekitongole kya NARO.
“Twagala kulaga abantu nti obulimi mulimu oguvaamu ensimbi era abavubuka singa tebeenyigiramu baliko kye bafiirwa. Balina okuva mu bikolwa by’okulwanyisa gavumenti naye bakwatagane nayo ebayambe.” Mutabaazi bwe yagambye.
Ono yamalirizza alaga okutya olw’ekitongole ky’ebyobulimi n’ekitongole ekivunaanyizibwa ku mutindo, okulemwa okutangira eddagala effu okuyingira ku katale.