Bya Ssemakula John
Kamwokya
Akulira ekibiina kya National Unity Platform (NUP), Mr Robert Kyagulanyi aka Bobi Wine, awadde bannamateeka be ekiragiro okuggyayo omusango mu kkooti ensukkulumu gwe yali awaabye ng’awakanya obuwanguzi bwa pulezidenti Yoweri Kaguta Museveni mu kalulu akaakubwa nga January 14, 2021.

“ Tuggyeeyo omusango mu kkooti naye ate tetugenda kukozesa bikolwa byaffujjo. Tusazeewo okuggyayo omusango mu kkooti ya Mw. Owiny Dollo.” Bw’atyo Kyagulanyi bw’ategezeezezza bannamawulire bakung’aanidde ku kitebe ky’ekibiina e Kamwokya.
Kino kiddiridde abawawaabirwa okuli; Pulezidenti Yoweri Musevenim akakiiko k’ebyokulonda wamu ne Ssaabawolereza wa gavumenti, okuteekayo okwewozaako kwabwe mu bujulizi obuwerera ddala 185 okwanukula ensonga 53 Kyagulanyi ze yali asinziddeko okuwakanya obuwanguzi bwa Museveni.
Bannamateeka ba National Resistance Movement (NRM) baavuddeyo ne balabula Kyagulanyi obutaggyayo musango nga bwanaakikola ajja kubaliyirira ssente eziwerera ddala.
Akulira eby’amateeka mu NRM, Oscar Kihika, yagambye nti bajja kusaba Kyagulanyi okusasula ssente zonna ezisaasaanyiziddwa mu musango wamu n’obudde bwabwe.
“Kansuubire bannamateeka ba Kyagulanyi banaawa omuntu waabwe amagezi obutaggyayo musango. Kuba waliwo ebintu ebirina okukigoberera. Bwe biba nga bye yayogedde abitegeeza, alina okukimanya nti si kintu kyangu.” Bw’atyo Kihika bwe yagambye.
Kihika yannyonnyodde nti singa aggyayo omusango alina okukimanya nti alina okuliyirira bannamateeka baffe olw’obudde n’okubamalira ebiseera.
Kino kizzeewo oluvannyuma lwa Ssaabalamuzi n’abalamuzi abalala babiri okugaana okuva mu musango guno nga Kyagulanyi bwe yali asabye.
Munnamateeka wa Kyagulanyi, Anthony Wameli, akakasizza nga Kyagulanyi bw’ali omwetegefu okusasula singa omusango anaaba aguggyeeyo.
Wabula ye Kyagulanyi ategeezezza bannamawulire nti mwetegefu n’okusinga aba NRM kye balowooza kuba baasasula dda ekisingako ng’okuva akalulu lwe kaatandika, abantu be bazze battibwa era teri muwendo guyinza kusinga bulamu bw’abantu.









