Bya Noah Kintu
Ssembabule
Entiisa ebuutikidde ttawuni kkanso y’e Matete mu Mawogola oluvannyuma lw’abantu abatannategeerekeka okulumba ekitundu kino ne batta omukuumi mu bukambwe ne banyaga amaduuka okuli aga Mobile Money n’agatunda eby’amasannyalaze.
Bino byaguddewo mu kiro ekikeesezza olwaleero ku ssaawa nga 9 ez’ekiro mu Park yard y’e Mateete.
Eyattiddwa ye George William Bananuka ow’emyaka 45 nga y’abadde akuuma ekifo kya Park yard. Omulambo gwa Bananuka gwasangiddwa nga guliko ebisago nga gukwekeddwa mu kimotoka ekikadde ekisangibwa mu ppaaka eyo.
Oluvannyuma poliisi y’e Ssembabule ng’ekuliddwamu Tindyebwa William ezze n’embwa okuzuula ettemu lino.
Omu ku baana b’omugenzi annyonnyodde ng’obudde bwe bwazibye nga tebalaba kitaabwe era ne bajja w’akolera, ne basanga nga yattiddwa.
Nnannyini Ppaaka eno Byekwaso Takalirye yategeezezza nti yayitiddwa n’asanga ng’enju yamenyeddwa nga n’omukuumi attiddwa n’ategeeza nti obubbi bususse mu kitundu kyabwe.
Omu ku babbiddwa Sumayiya Nalubega yagambye nti ababbi bayise mu ssiringi era nga babbye essimu kw’ossa ne ssente enkalu ezitamanyiddwa muwendo.
Abatuuze baategezezza nti obubbi buludde nnyo mu kitundu ne basaba ab’ebyokwerinda bongere amaanyi mu by’okwerinda.
Okusinziira ku poliisi, waliwo abantu 3 abaakwatiddwa ku nsonga eno nga ku bano kuliko; Kiseka Samson, Bwambale Paul ne Juma Mukiibi.