Bya Yusuf Muwuluzi
Masaka – Buddu
Amyuka ssentebe w’ekibiina kya NRM mu Buganda, Minisita Godfrey Kiwanda, asekeredde abavubuka abeesomye okusindiikiriza Pulezidenti Yoweri Kaguta Museveni okuva mu buyinza nti, bagira balindako.
Minisita Kiwanda Suubi yategeezezza nti Pulezidenti Museveni asinga kulowooza ku bavubuka naye ate abamu ku bo beenyigidde mu bikolwa by’effujjo okumusindiikiriza.
Kiwanda yasabye abavubuka naddala mu Masaka okulonda Museveni wamu n’okumuweereza ababaka bw’ebafaanaganya endowooza basobole okukulaakulanya ekitundu kyabwe.
Bino Kiwanda yabyogeredde ku Zebra Hotel ku mukolo gw’okutongoza okunoonyeza Pulezidenti Museveni akalulu mu ttunduttundu lye Masaka mu kalulu ka 2021 ku mukolo ogwabadde ku Zebra Hotel mu Masaka, gye yabadde awerekedde ku amyuka Pulezidenti Kiwanuka Ssekandi.
Bannakibiina kino okwabadde abeesimbyewo, abasuubuzi abeegattira mu kibiina kya Greater Masaka NRM Business Community wamu n’abavubuka nga bakuliddwamu Benon Mugalulu bategeezezza nti balina okukola kyonna okulaba nga bawangula akalulu mukitundu kino.
Omumyuka w’omukulembeze we ggwanga era eyabadde omugenyi omukulu ku mukolo guno, Edward Kiwanuka Ssentamu yagambye nti abasuubuzi bamuwendo nnyo kuba bebayimirizaawo eggwanga nga basasula omusolo era nabeebaza kolw’okuwagira NRM.
Ono Yayongeddeko nti gavumenti egenda kuteekawo enkola ey’okuyamba abasuubuzi b’omuyuganda okulaba nga eggwanga likendezza kukuyingiza ebintu okuva ebweru kisobozese okutondawo akatale kuebyo ebikolerwa wano.
Ye Eng. Benon Mugalula, ku lw’abasuubuzi yeebazizza gavumenti ya NRM olw’enkulaakulana etuukiddwako e Masaka wansi wa NRM ng’okuzimba enguudo, abantu okuzimba ennyumba ez’omulembe, amakolero n’ebirala.
BannaNRM abeetabye ku mukolo guno banjuddwa abo abesimbyewo ku kkaadi ya NRM ku bifo by’obubaka bwa palamenti mu Masaka omubadde Asiimwe Robert avuganya ku kya Kimaanya-Kabonera, Kiyimba Sarah ku kifo kya Nyendo-Mukungwe ne Mwesigye Willis Mbabazi ku kifo kya Mmeeya wadde nga n’eyeesimbyewo ku lulwe omugagga Emmanuel Lwasa naye yabaddewo.