Bya Ssemakula John
Kyaggwe
Akwatidde ekibiina kya National Unity Platform (NUP), Robert Kyagulanyi Ssentamu(Bobi Wine), alumbye Pulezidenti Museveni ku bigambo bye yayogedde ng’avumirira abeekalakaasa n’okubalabula obutakiddira.
Kyagulanyi bw’abadde anoonya akalulu mu bitundu by’e Mukono ku Mmande, agambye nti aba NRM bapangisa abavubuka ne babagatta mu bawagizi baabwe okukola effujjo ku poliisi n’amagye okubavumaganya.
Kino kiddiridde Pulezidenti Museveni eggulo bwe yabadde ayogerako eri eggwanga, okulabula abeekalakaasi abakuba abapoliisi okukikomya era n’awagira ekya bakuumaddembe abakuba amasasi mu okwetaasa oluvannyuma lw’okukwata Kyagulanyi eyali e Luuka mu Busoga ng’anoonya akalulu.
“Museveni yabadde ku ttivvi jjo n’agamba nti agenda kusasula abantu be battidde abantu baabwe naye abantu b’e Nakifuma ka mbabuuze, omuntu ayinza kusasula ssente mmeka okukuttira owuwo.” Kyagulanyi bw’abuuzizza abawagizi be.
Kyagulanyi ategeezezza ab’e Nakifuma okunyweza obumu nga tebafudde ku mawanga g’abantu kubanga bonna ebibaluma bye bimu.
Ab’eno Kyagulanyi abagambye nti olutalo lw’okuggya Museveni ku buyinza lugenda kubaamu okufiirwa n’okwelekereza era n’abakunga obutakomya kubanja ddembe lyabwe.
Kyagulanyi yayaniriziddwa ebikumi n’ebikumi by’abantu e Nakifuma, yavuddewo bubi n’abakuumaddembe obwedda abamugaana okukozesa enguudo zimwasa njala nga bagamba nti kijja kuleetawo akalipaggano k’ebidduka mu kitundu kino.
Abamu ku balonzi e Nakifuma Kyagulanyi bamusabye olutuuka mu ntebe asooke abakolerere ku by’obulamu, ebyenguudo wamu n’okubagobako obwavu obuyitiridde mu byalo byabwe.