Bya Musaso Waffe
Kampala
Bannaddiini abeegattira mu kibiina ekitaba enzikiriza ekya Inter-Religious Council of Uganda (IRCU), basabye gavumenti eyimbule Munnakibiina kya National Unity Platform, Robert Kyagulanyi Ssentamu n’abalala abakwatiddwa olw’okumenya ebiragiro ebitangira Ssennyiga Corona.
Ssentebe w’ekibiina kino, Mufti Sheikh Shaban Ramathan Mubajje, agambye nti Bobi Wine ne Patrick Oboi Amuriat bwe baba nga bazzizza omusango gwonna, batwalibwe mu kkooti ebavunaane era amateeka galekebwe okukola ogwago.
Basabye akakiiko k’ebyokulonda wamu n’ebitongole by’ebyokwerinda, okussa ekitiibwa mu ddembe ly’obuntu nga bwe birambikibwa mu Ssemateeka w’eggwanga.
Bagamba nti Uganda Police Force nayo yamenye ebiragiro (SOPs) ebya COVID-19 ebiri mu kawayiro aka 21(3) akagamba nti, Poliisi ejja kulumirirwa eggwanga, bajja kukozesa obukugu n’ebirala.
Bakubirizza abasirikale okugoberera Ssemateeka wa Yuganda nga bakola emirimu gyabwe era bakozese obwenkanya nga balamula Bannayuganda, nga tebafuddeyo ku kibiina kye bawagira.
Bino we bijjidde nga Katikkiro wa Buganda, Charles Peter Mayiga, yaakamala okulabula ebitongole by’ebyokwerinda ku kutulugunya bannansi n’abeesimbyewo ku bifo ebyenjawulo, nga beekwesa mu Ssenyiga Corona, era n’abasaba okussa ekitiibwa mu ddembe ly’obuntu.