Bya Gerald Mulindwa
Namugongo
Kamalabyonna wa Buganda, Charles Peter Mayiga, atenderezza emirimu gy’omusaserodooti Msgr. John Wynand Katende olw’okufaayo ennyo ku bantu mu biseera eby’essanyu wamu n’ennaku.
“Atunoonya era afuba okutegeera ebitufaako, nga bw’ababuulidde nze namulaba dda nnyo e Lubaga ate era mulaba nakati nga ndi Katikkiro,” Owek. Mayiga bw’amutenderezza.
Okwogera bino Kamalabyonna abadde ku mukolo gwa MSGR John Wynand Katende ng’ajaguza okuweza emyaka 40 mu busaserodooti oguyindidde e Kyoto mu Namugongo.
Mayiga agambye nti ono abadde mukozi nnyo era ow’obusaserodooti obutambula n’ategeeza nti Katonda tayimirirawo ku ssaala zokka naye n’enkulaakulana erabikako.
Ono akubirizza abantu bulijjo okulemerako era banywerere ku bye bakola kibasobozese bye batuukako, nga kino kye kijja okubayamba okukulaakulana era basobole okuzza Buganda ku ntikko.
Owek. Mayiga yeebazizza Msgr. Katende olw’okwagala Obwakabaka n’ekika kye eky’Olugave era n’amusiima olw’okutegeera Katonda awamu n’ebyensi naddala ebyo ebya Buganda.
Katikkiro asimbye ejjinja ku kizimbe ky’emyaliro esatu ekigenda okuzimbibwa okusulamu abalamazi era n’akiwa erinnya erya “Enju Y’Abalamazi” nga kyakumalawo obuwumbi 7 obwa ssiringi.
Msgr. Katende asiimye abazze okwetaba ku mukolo guno era n’ategeeza nti Katonda y’amuyambye okumuteerawo olutindo wakati we n’abantu babadde akulembera.
Ono agambye nti mu obuweereza bwe tebubadde bwa Ekelezia yokka naye era aweerezza ne Ssaabasajja Kabaka nga yeetaba butereevu ku mukolo gw’okutikkira Ssaabasajja e Naggalabi mu Busiro.
Omukolo gwetabiddwako; Omulangira David Wasajja, Eyali Katikkiro Mulwanyamuli Ssemwogerere, Minisita Noah Kiyimba, Ssentebe wa Twekobe ejjudde Godfrey Kirumira, Mmeeya wa Kira Julius Mutebi, Owek. John G.W Katende, awamu n’abantu abalala.