Bya Ssemakula John
Kampala
Pulezidenti Yoweri Kaguta Museveni akakasizza ku Ssande nti, Kabbineeti bweyakkirizza amasomero okuggulawo era nga gano gaakusooka n’abayizi abakola ebibuuzo byabwe ebyakamalirizo ku mitendera egy’enjawulo nga bano baakutandika nga 15 Ogwekkumi 2020.
“Tusazeewo okuggula amasomero eri abayizi abamalirizza emitendera okuli; P.7, S.4 ne S.6, amatendekero wamu ne ssettendekero. Tulowooza nti abayizi bano batono era basobola okwetangira ekirwadde kya Ssennyiga Corona.” Museveni bwe yategeezezza nga ayogerako eri eggwanga ku mbeera y’ekirwadde kya COVID-19.
Museveni yategeezezza nti waliwo amasomero naddala ag’obwannannyini agayinza okusanga akaseera akazibu okuggulawo kubanga amasomero bagalimu lwa bizineesi n’ategeeza nti ku kino Minisitule y’ebyenjigiriza agiragidde okwongera ku muwendo gw’amasomero ga ssekendule wamu n’ebibiina mu ggwanga.
“Minisitule y’ebyensimbi erina okusisinkana bannannyini masomero balabe engeri gavumenti gy’eyinza okubayambamu.” Museveni bweyannyonnyodde.
Museveni yalaze nga bwe baakitunuddemu ng’okuleka amasomero nga maggale bwekirina ebizibu byakyo kubanga buli mwaka wabeerawo abayizi abava ku mutendera ogumu okudda mu mulala.
Museveni yasuubizza nga bw’agenda okufuba okulaba ng’abaana basigala basomero ku leediyo, n’embeera y’ekirwadde kya COVID-19 bwenaaba evuddewo kibayambe okugabana ebisomesebwa abasomesa abakugu.
Ebikulu ebisaliddwawo;
- Amasomero gaakuggulawo nga 15 Ogwekkumi okutandika n’abayizi aba P.7, S.4, S.6, amatendekero agawaggulu agalina abayizi abamaliriza emisomo.
- Ekisaawe ky’ennyonyi n’ensalo bigguddwawo eri abalambuzi abayingira n’abafuluma. Bano balina okuba nga bakebeddwa nebasangibwa nga tebalina kirwadde mu bbanga lya ssaawa 72 nga tebannayingira mu Uganda era ababalambuza balina okufuba okulaba nti bano tebeegatta na bannansi. Bannayuganda abakomawo nga balina ebbaluwa ezikakasa nti tebalina kirwadde baakukkirizibwa, era bano baakukkirizibwa okugenda ewaka so si kalantiini nga bwekibadde, ng’eno aba Minisitule y’ebyobulamu gye bagenda okubalondoolera.
- Amateeka ku ntambula y’abantu ku disitulikiti eziri ku nsalo biggyiddwawo.
- Kafyu asigaddewo okuva ku ssaawa ssatu okutuuka ku ssaawa 12 ez’okumakya naye aba boodabooda baakukoma ku ssaawa 12 ez’olweggulo.
- Amasinzizo gagguddwa nago gaakugoberera ebiragiro bya COVID-19; Abantu abaagala okwejjusa oba abaagala okubalyowa emyoyo n’okubawa ku magezi bakkiriziddwa okugenda mu masinzizo. Okusaba tekulina kusussa bantu nsanvu (70) era baakugoberera ebiragiro. Okusaba kw’ekiro nakwo kukyagaaniddwa.
- Emizannyo gyomu bisaawe gikkiriziddwa naye abawagizi bagaaniddwa, baakugirabira ku ttivi. Abazannyi balina okukeberwa buli luvannyuma lwa nnaku 14.
- Ebbaala, Cinema n’ebifo omuzannyirwa Zzaala bikyali biggale
- Wooteeri zaakukola nga zigoberera ebiragiro bya COVID-19
- Ebirabo by’emmere byakusigala nga eby’okulya ng’emmere abantu bagibasibira nebagitwala, abalina okuliira mu bifo bino balina kubeera batono ddala.
- Enkung’aana z’abantu abangi ziwereddwa.
- Obutale bw’omubuulo n’obutale omutundirwa ente bukyaggaddwa.
- Abagishu abali mu mikolo gy’okusala embalu basabiddwa okugoberera ebiragiro ebyabaweebwa minisitule y’ebyobulamu era nebalabulwa obutazina Kadodi kuba kakung’aanya abantu.