Bya Gerald Mulindwa
Mukono
Minisita wa gavumenti ez’ebitundu mu Bwakabaka bwa Buganda Oweek. Joseph Kawuki asabye bannabyabufuzi okukola eby’obufuzi ebijjudde obugunjufu n’obuntu bulamu.
“Nandisabye abalonzi nti omuntu akozesa okuyomba, alimirira munne, agulirira ssi ye mukulembeze omutuufu asaanye okuwa akalulu, “ Minisita Kawuki bweyategeezezza.
Bino Kawuki yabyogeredde mukuziika eyaliko omumyuka w’omwami w’Essaza Bugerere Owek. Asaph Ssenyonga eyazikiddwa ku Lwomukaaga e Kayunga Bugerere.
Kawuki yagambye nti wadde abantu abamu basabye Obwakabaka okubaako be buwandako eddusu naye nga Buganda bagala abeesimbyewo bewandeko eddusu nga balaga webayimiridde ku nsonga Buganda Ssemasonga etaano.
“Omuntu abalage n’engeri gyanalwaniriramu ensonga za Buganda so ssi kwogera bwogezi nti njakulwanirira okwegatta kw’ abantu, tukimanyi nti Bugerere yeemu ku masaza agasingamu amawanga amangi wano mu Buganda naye onabagatta otya?” Owek. Kawuki bweyalambuludde.
Ono yasabye abantu okulonda oyo yenna alaga emisana ttuku nti awagira ensonga za Buganda okuli; Okulwanirira enfuga ya Federo, okukuuma n’okutaasa Nnamulondo, okukuuma ettaka n’ensalo za Buganda, okukola ennyo okwekulaakulanya n’okugatta abantu ba Ssaabasajja Kabaka.
Minisita Kawuki bweyabadde ayogera ku mugenzi yanyonyodde nga Ssenyonga bwabadde omusajja omuvumu eyalwanirira ennyo ekitiibwa kya Buganda, mukaseera weyaberera nga yakuuma essaza lino wakati mu kusomoozebwa nasaba abantu okumuyigirako.
Okusaba n’okwebaza olw’obulamu bw’omugenzi kwakulembeddwamu Omulabirizi w’e Mukono William Ssebaggala, eyasiimye Nnamwandu olw’okunywerera ku Ssenyonga mu mbeera yonna.
Omulabirizi Ssebaggala yayogedde ku mugenzi nga abadde omusajja buli muntu gwe yegomba wamu n’okukuza abaana be mu ngeri ennungi.
Okuziika kuno kwetabiddwamu ebikonge okuva mu Bwakabaka bwa Buganda ne gavumenti eyawakati.