Bya Ssemakula John
Kasangati
Omubaka wa Nakaseke South mu Palamenti Luttamaguzi Ssemakula n’abawagizi be 22, ku Lwokuna basindikiddwa mu kkomera lye Kasangati mu Wakiso okutuusa nga Septmber 3, lwe banadda okusaba okusaba okweyimirirwa.
Luttamaguzi ne banne bakwatiddwa ku Lwokusatu bweyabadde ku kyalo Wakasanke ku luguudo oluva e Matugga okudda e Semuto nga agenda okukola Bulungibwansi mu ttawuni kkanso ye Semuto.
Oluvanyuma yatwaliddwa ku poliisi ye Butalangu okutuusa ku Lwokuna bwasimbiddwa mu maaso g’omulamuzi wa kkooti ento e Nakaseke navunaanibwa okukola ebikolwa ebiyinza okuvaako okusaasaana kw’ekirwadde ki COVID-19.
Luttamaguzi avunaaniddwa okukuba olukungaana olumenya amateeka wamu n’okweyisa nga ekitagasa mu bantu.
Munnamateeka we Richard Lumu, yategeezezza nga kaweefube wabwe okumweyimirira ku kakalu ka kkooti bwaggudde obutaka olwo omulamuzi obutabakkiriza kuteekamu kusaba kuno.
Ddereva wa Luttamaguzi ayitibwa Samuel Kintu, yanyonyodde nga Omubaka bweyagezezzaako okubuuza poliisi eyabadde emukwata omusango gweyabadde azizza wabula nebatamunyega.
Wano abawagizi ba Luttamaguzi bagezezzaako okulemesa poliisi okumukwata, ekyawalirizza poliisi eyabadde eddumirwa Afande Sulait Kitaka okulagira nebabakubamu ttiyaggaasi era nebasaasaana.
Omwogezi wa poliisi mukitundu kya Savannah Isah Ssemwogerere, yategezezza nga bwebakutte Luttamaguzi okumulemesa okukuba olukungaana kubanga kyabadde kimenya ebiragiro bya COVID19