Bya Ssemakula John
Kampala
Omukubiriza w’olukiiko lw’abataka omutaka Kayiira Gajuule, alabudde bannayuganda okukozesa omutimbagano n’obuvunanyizibwa era beewale okusaasaanya amawulire amakyamu.
Jjaja Kayiira bino abyogeredde mukutongozza akatabo ‘From a Fishmonger to a Prominent Educationist ’akawandiikiddwa Omuk. Mike Kironde ku mukolo ogwabadde ku wooteri ya Mestil mu Kampala ku Lwokuna.
Omutaka Kayiira anyonyodde nti “Njagala okusaasira abantu abenjawulo kubanga abamu ku ffe tusobola okutuka emitima, twegendereze bye tuteeka ku mitimbagano kubanga bisobola okuleetawo obutali butebenkevu mu Buganda ne Uganda”
Kino kiddiridde abamu ku bantu okuteeka amawulire ku mutimbagano nga balaga nga Nnyinimu Ssaabasajja Kabaka bweyawereddwa ekitanda.
Kino kyawalirizza Katikkiro Charles Peter Mayiga okutegeeza Obuganda nga Beene bwali omulamu obulungi era nga mwali alamula.
Omutaka Gajuule yasiimye Omuk. Kirondo olw’okubeera n’emikwano egirimu ensa.
Bwabadde atongozza akatambo kano, Minisita w’ebyentambula Gen. Katumba Wamala era nga yabadde omugenyi omukulu asabye abazadde bulijjo okuteekateeka abaana babwe obulungi, kimalewo omuzze gw’okusabirizza oguyingidde mu bavubuka.
Ate ye omukungu Mike Kironde yeebazizza Katonda olw’okuweza emyaka 40 nga aliko aliko kyalaga mu bulamu.
Kironde anyonyodde nti omusingi ogumuyambye okubaako ettofaali lyateeka ku by’enjigiriza gwasimibwa Kitaawe mu kaseera weyabeerera omuto.
Yategeezezza nti, okuwandiika ekitabo kino yagendereddemu okuzza essuubi mu bavubuka n’abakuze mu myaka okukola ennyo babeeko omukululo gwebaleka munsi.
Yasabye abavubuka bulijjo okukimanya nti obugagga buva mukukola nnyo n’obutasosola mu mirimu so ssi famile muntu mwava.
Omuk. Kironde ye mutandisi w’amasomero ga Janan era nga omukolo gwetabiddwako baminisita n’ abakungu ab’enjawulo okuva mu Bwakabaka, bannalotale ne bannabyanjigiriza.