Omutendesi wa kiraabu ya Tooro United omuggya Edward Golola, yeeyamye okukyusa ttiimu eno efuuke eky’okulabirako esobole okuzzaawo ettutumu lyaayo.
Bweyabadde ayogerako eri akakiiko ak’ekikugu oluvanyuma lw’okumwanjula ku Tavern Woods e Kabuusu ku Lwokusatu, Golola yasuubizza okuzzaayo ttiimu eno mu Uganda Premier League.
“Twagala okufuula Tooro United FC eky’okulabirako naddala mu kuzuula ebitone ebipya era nga nkakasa nti ttiimu eno ejja kutuwa ekyo kyenyini kyetwagala, nze ndi muwanguzi era nkakasa tujja kuwangula buli mupiira, “ Golola bweyategeezezza.
Abalala abagenda okuyambako Golola kuliko; Simon Ddungu amyuka omutendesi, Moses Oloya atendeka bakwasi ba ggoolo, Jamada Magaasi ne Fred Kasendeke owa ttiimu y’abato.
Omukolo guno gwetabiddwako omubaka wa Fort Portal mu palamenti Alex Ruhunda, ssenkulu wa ttiimu eno Richard Epieru ne pulezidenti waayo Alice Namatovu.