Musasi waffe
Katikkiro wa Buganda Oweek. Charles Peter Mayiga asabye abaami okutuukiriza obuvunaanyizibwa bwabwe mu maka ng’omu ku kaweefube w’okulwanyisa mukenenya.
Bwabadde ayogerera mu musomo gw’abaami oguyindidde mu Bulange e Mmengo, ng’omu ku kaweefube w’okujaguza amatikkira ga Ssaabasajja Kabaka aga 27, Mayiga agambye abasajja bwebaba baakulwanyisa mekenenya balina okulaga amaanyi nga batuukiriza ebibasuubirwamu ng’abasajja.
“Eggwanga lyaffe abasajja bebafuga n’olwekyo tuteekeddwa okukola okulaba nti tulwanyisa mukenenya era omwaka 2030 wegutanaatuukira nga sirimu takyali kizibu,” Oweek. Mayiga bweyagambye.
Mayiga yagasseeko nti ekimu ku bitabudde amaka lwakuba abasajja, basajja mu kwambala mpale kyokka so si mu bikolwa.
“Bwoba togula mmere, abaana tobasasulira bisale by’amasomero yadde okubakyalira, tosasula masannyalaze n’amazzi abaana tebakulaba oba musajja mu mpale kyokka,” Mayiga bweygaambye.
Katikkiro yannyonnyodde nti era abasajja balina omulimu munene okulaba nga baziyiza obusambattuko mu maka.
Yagambye nti amaka agalimu obusambattuko tegaggwamu siriimu.
“Tulina okulaba nga twenyigiramu mu nkuza y’abaana kubanga yengeri yokka ekuuma abaana ne batalambaala. Bakojja twagala bakole emirimu gyabwe baleme kulowooza nti omulimu gwabwe kuyigiriza balenzi kubeera kyuma kya mudaaki. Omusajja ow’obuvunaanyizibwa siraba butya bino eby’omukisenge bwebinaamulema.”
Omusomo gwetabiddwako Dr Nelson Musoba akulira ekitongole kya Uganda Aids Commission, Dr Richard Kabanda kamisona mu minisitule y’ebyobulamu wamu ne Karusa Kiragu akulira ekitongole ekirwanyisa siriimu mu nsi yonna ekya UNAIDS wamu ne minisita w’ebyobulamu mu Bwakabaka Oweek. Prosperous Nankindu Kavuma.