Musasi waffe
Obwakabaka bwa Buganda bunyoleddwa nnyo olw’okufa k’omuzira Dan Kaamanyi.
Kaamanyi yeyavuga Ssekabaka Edward Muteesa II okumujja ku Lutikko e Lubaga, n’amuyisa mu ssaza ly’e Butambala ne Gomba, n’amutuusa e Mawogola olunnyuma lwa kawenkene Milton Obote, okulumba olubiri lw’e Mmengo nga 24 May 1966.
Muteesa yabuuka bbugwe w’olubiri n’ayolekera Lutikko e Lubaga eyo musajjawe Dan Kaamanyi gyeyamusanga okumutuusa e Mawogola, gyeyasanga basajjabe omwali Sebastian Kitayimbwa Mumiransanafu eyali Muteesa atwala essaza ly’e Mawogola nebakola enteekateeka okufuluma Uganda ng’ayitira e Burundi, Ssekabaka gyeyafunira ennyonyi y’emigugu eyamutuusa e Bungereza.
Katikkiro Charles Peter Mayiga ategeezezza Bannamawulire ku mbuga enkulu e Bulange Mmengo nti Dan Kaamanyi ajjirayo ddala ekitundu mu kitiibwa kya Buganda ekigamba nti ‘Abazira ennyo abatusooka balwana nnyo mu ntalo, nebayagala nnyo eggwanga lyaffe naffe tulya galenga.’
“Dan Kaamanyi yali muvubuka mu 1966, yali muzira yayagala nnyo Kabaka we n’eggwanga lye.
Olugendo lw’okuzza Buganda ku ntikko lwetaaga abantu abamalirivu, abantu abetekkiriranya, abemizzi, abeesigwa,” Mayiga bweyagambye.
Yagasseeko nti tekigasa kugamba nti Ssaabasajja Kabaka awangaale nga tosobola kukiraga mu bikolwa.
“Obulamu bwa Dan Kaamanyi butujjukiza nti ekiryatabaala kyekirya naasigadde eka kubanga n’abataakola Kaamanyi byeyakola ekiwendo kya Obote kyebayoola.
N’abo abalyamu Buganda olukwe, ekiwendo nabo kyabayooleramu. Tumalirire okukuuma Namulondo bulijjo,” Mayiga bweyagambye.
Mu 2008, Ssaabasajja Kabaka Ronald Muwenda Mutebi yasiima emirimu gya Kaaamayi e Mawogola era n’amuwa engule.