Omuwendo gw’abantu abalina coronavirus gweyongedde mu Uganda kati bali 253 oluvannyuma lw’abantu 31 okukeberebwa nebasangibwamu obulwadde.
Abantu 1116 bebaakebereddwa. Kubaazuuliddwamu obulwadde, 23 bavuzi ba bimotoka abaayingidde eggwanga okuyitira ku nsalo ez’enjawulo.
Kyokka omunaana obulwadde baabufunye okuva ku bavuzi b’ebimotoka bino mu bitundu eby’enjawulo.
Okusinziira ku minisitule y’ebyobulamu, abantu omunaana bonna baabadde mu kalantiini n’olwekyo tewaliiwo kutya nti ob’olyawo balina abantu abalala bebaasiize.
Kyokka era abantu abalala 20 abatali Bannayuganda nabo era baasangiddwamu ekirwadde kino nebaweerezebwa ewaabwe.
Kubano, kwabaddeko Abatanzania 16 ne Bannakenya bana.
Bano baawezezza abantu 300 abaakazibbwayo ewaabwe olw’okusangibwamu coronavirus.
Uganda yakyusa mu nkola nga kati tekyakkiriza muntu yenna mugwira kuyingira ggwanga nga tamaze kukebererebwa coronavirus.
Abo abasangibwa n’olumbulege tebakkirizibwa kuyingira wabula baddizibwayo gyabava.
Minisita avunanyizibwa ku by’obulamu Dr Jane Ruth Aceng yategeezezza nti kyabulabe okujjanjjabira abagwira wano kubanga kyongera omukisa obulwadde bwa coronavirus okusaasaana mu ggwanga naddala mu bantu abavuzi b’ebimootka bano gyebatera okubeera.
Uganda yakajjanjjaba abantu 69 nebawona coronavirus. Kino kitegeeza nti abalala 184 bebakyajjanjjabibwa.
[URN]