Musasi waffe
Gavumenti eweze okufaafaagana n’omuntu yenna agezaako okugoba abantu kuttaka mu kaseera kano ak’omuggalo olw’ekirwadde kya Coronavirus.
Bwebabadde boogerako eri Bannamawulire kussengejjero ly’amawulire ga gavumenti erya Uganda Media Centre mu Kampala, baminisita ab’enjawulo okubadde Ow’obutebenkuvu bw’eggwanga Elly Tumwine, Ow’ebyettaka Beti Kamya, wamu n’omumyukawe Persis Namuganza, ow’ebyassemateeka n’essiga eddamuzi, Ephraim Kamuntu, owa gavumenti ez’ebitundu Raphael Magyezi wamu n’owa
ICT, Judith Nabakooba, bagambye kuluno tebalina ggwe bagenda kuttira kuliiso.
“Oba oli minisita, oba RDC, oba musirikale ki bw’oneenyigira mu kusengula abantu kuttaka tujja kusiba, tewali kusaaga,” bwatyo Tumwine bwategeezezza.
Yagambye nti emisango egisinze okuloopebwa mu kaseera k’omuggalo gyonna gyekuusa ku ttaka.
“Ekkooti nzigale, entambula yawerwa, kati bw’osindiikiriza omuntu oyagala alagewa?” Tumwine bweyeebuuzizza.
At ye Kamya yagambye okuva bweyawera okutunda oba okugula ettaka nga April 16 yali asuubira nti abakungu ba gavumenti ab’enjawulo baali baakussa kiragiro kino mu nkola naye kimwewunyisa nti abamu benyigira mu kusengula abantu.
“Oko kulya mu gavumenti lukwe kubanga minisita bwalagira ekintu akikola ku lwa gavumenti. Omusirikale yenna ayenyigira mu kusengula abantu ng’ate nze nga Minisita nakigaana aba ajeemedde Ppulezidenti era aba asekeeterera gavumenti,” Kamya bweyagambye.
Bino webigyidde nga n’Obwakabaka bugugulana ne RDC w’e Sembabule Nuwagaba Kabuye olw’okukozesa ekifuba n’azimba ku ttaka ly’essaza ly’e Mawogola newankubadde nga yalabulwa obutakikola.
Minisita Namuganza yategeezezza nti enkya waakugenda e Sembabule okuyingira mu nkaayana zino nti era siwaakuvaayo okujjako ng’ebyazimbibwa ku ttaka lino bimenyeddwa.