Musasi waffe
Ssaabalabirizi w’ekkanisa ya Uganda omuggya, Dr. Stephen Kaziimba Mugalu atuuziddwa mu butongole
Ku mukolo guno obwakabaka bukiikiriddwa Katikkiro, Charles Peter Mayiga, Nnabagereka Sylivia Nagginda,
Omumyuka wa Katikkiro asooka era Minisita w’enzirukanya y’emirimu n’obuyiiya Owek Pulofeesa Twaha Kigongo Kaawaase, Omumyuka wa Katikkiro ow’okubiri era Minisita w’eby’ensimbi, Oweek. Robert Waggwa Nsibirwa, Omukubiriza w’olukiiko lwa Buganda Oweek. Patrick Luwagga Mugumbule, Namasole Margaret Siwoza, Omulangira Kassim Nakibinge Kakungulu, Baminisita ba Kabaka, n’abaami ba Kabaka abawerako.
Mu bubakabwe, Katikkiro agambye nti,
“Tukwenyumirizaamu nnyo olwobutasuula nnono n’okubeera musajja wa Kabaka . Mu buweerezabwo olumirwa nnyo Bannayuganda n’esonga ezibakwatako. Okubeera Ssaabalabirizi buvunaanyuzibwa bunene. Nesiga nti Katonda ajja kukubeera okozese obuyinza bwakuwadde twongere okufuna emirembe n’okutebenkera wamu nenkulaakulana,” Mayiga bweyasibiridde Kaziimba.
Yagasseko nit ennaku zino ebikolwa eby’obukambwe n’ettemu bingi nnyo, n’abantu bangi nnyo abalina obusungu ku mitima, ate n’abakirisito bangi bali mu bwavu. N’amusaba nga Ssaabalabirizi okufuba okulungamya abantu bonna okusobola okuvuunuka okusomoozebwa oko.
Ssaabalabirizi omuggya, asuubizza okukyuusa embeera z’abantu naddala okukwata ku baana abalenzi nabo basobole okufuuka eb’omugaso mu ggwanga.
Omukolo guno gwetabiddwako abantu abalala bangi omuli bannaddiini okuva mu nzikiriza endala, bannabyabufuzi okubadde n’omukulembeze w’eggwanga Yoweri Kaguta Museveni, mukyalawe, Janet Museveni sipiika wa palamenti Rebecca Alitwala Kadaga n’abalala bangi