Musasi Waffe
Omukulembeze w’eggwanga Yoweri Museveni alagidde, Ssenkaggale wa Poliisi Martin Okoth Ochola agobe abasirikale bwonna beesuulirayo ogwannaggamba nebeerabira omulimu ogw’abakwasibwa ogw’okukuuma abantu n’ebintu byabwe. Bwabadde ayogerera ku kitebe kya Poliisi muggwanga kukasozi Naguru mu Kampala, ng’atongoza ekkunganyizo ly’ebikatibwa kamera z’okunguudo,Museveni agambye poliisi erina kusigaza basirikale abo bwokka abaagala kyebakola. “Oyo yenna atayagala Uganda ne Bannayuganda nga bwembaagala sifaayo oba bawanvu oba bampi, balungi oba babi; bwoba tolowooza bwotyo, baggobe mu poliisi, esigaze abo bwokka abatunuulira Uganda ng’abantu eb’enju emu,” Museveni bweyagambye. Okusalawo okuteeka kamera kunguudo, kyadirira okweyongera kw’obutemu obw’emmundu mu Kampala n’emirirwano nga buno bwafiiramu abantu ab’enjawulo bangi omuli eyali ayogerera poliisi mu Kampala, Andrew Felix Kaweesi, Omuduumizi wa Poliisi ye Buyende, Muhammad Kirumira, Maj Muhammad Kiggundu, abakulembeze babasiraamu, Hassan Kirya, Mustapha Bahiga, AbudurKarim Ssentamu, n’abalala bangi.