Bya Samuel Stuart Jjingo
Kibuli – Kyaddondo
Mu kwetegekera okukuza olunaku lwa Bulungibwansi nga 8 Mukulukusabitungotungo 2026, enzikiriza ez’enjawulo okwetoloola amasaza 18 zitandise okusabira Obuganda, okubuwonga eri omutonzi n’okumwebaza ebirungi n’obuwanguzi Buganda bwetuuseeko okuva mu 1962.
Ku muzikiti e Kibuli, dduwa y’okusabira Obuganda ekulembeddwamu Sheikh Saamaha Bakasambe, era yetabiddwamu Omulangira Kassim Nakibinge.
Eno obubaka bwa Katikkiro busomeddwa Oweek Hajji Amisi Kakomo Mukasa, Minisita w’Obulimi, Obulunzi n’obwegassi mu bwakabaka.
Mu bubaka bwe, Kamalabyonna atenderezza abantu ba Buganda olw’omutima ogwa Nnakyewa gwebakulembeza mu kukola emirimu n’okuvujjirira Obwakabaka akabonero akalaga enkola ya Bulungibwansi eyoleka ekitiibwa kya Buganda n’obugunjufu.
Mukuumaddamula ayongedde okukubiriza Obuganda okwongera okwettanira enkola ya Bulungibwansi eyateekebwawo Gavumenti ya wakati eya buli mwezi.
Akunze abantu ba Kabaka okujja mu bungi ku mbuga y’e ggombolola Ssaabawaali Gombe mu Kyaddondo okwetaba ku mukolo gw’okujjuukirirako olunaku lwa Bulungibwansi nga 8/10/2026.
Super Supreme Mufti, Sheikh Mohammed Shaban Galabuzi, alabudde abantu ku kabi akali mu bukyafu naddala amaka agakyalemye okuzimba kaabuyonjo n’asomooza abantu okuddayo ku musingi gwa bulungibwansi.