Bya Pauline Nanyonjo
Mengo -Kyaddondo
Makerere University Convocation kye kibiina ekigata abo abaasomerako e Makerere abakyasomerayo wamu nabakolerayo nga bano bafuba okulaba nti banyikiza emirimu egyenjawulo gy’ebakola naddala egy’enkulakuna kubuli ayina akakwate ku ssetendekero wa Makerere wamu n’okulondoola embeera abantu abo mwebawangaalira.
Ssentebe wa Makerere University Convocation George Turyamuleeba Mugabi alaze nti bagala kukwatira wamu n’Obwakabaka mu nkola y’emirimu okuyita mu kunonyereza Makerere kwekola wamu nakakwate kebalina ku Buganda basitule embeera z’abavubuka mubulamu bwabwe nga bakulakulana.
Bano bagala okutambula n’Obwakabaka nga batambuza pulojekiti zebabazeewo ezitali zimu okuli okusitula embeera zaabo abasomerako e Makerere nga batandikawo ekitavu kyensimbi batandikewo banka y’ensimbi eya Makerere, okubuddabudda abayizi okuyita mu nteekateeka y’okubabulirira badizibwemu amaanyi, okumanyisa abayizi ku nkola y’emirimu empya bafulumizibwe ku katale k’emirimu nga bakugu n’ebirala.
Katikkiro anyonyodde obukulu bw’obukulembeze mu masomero nga olukiiko lwa Makerere University Convocation olukola emirimu gy’okunonyereza ku mbeera z’abantu abayitira mu Makerere nga ettendekero ekisobola okubayamba okusunsula biki byebalina okusomesa abayizi abayitirayo, bafulumizibwe nga bongeddwako ettofaali erigasa ensi yabwe kale asabye obukulembeze buno okunyikiza obukulu bw’okukola mu bavubuka.
Okumanya ebisoomoza abantu n’ebabifunira eddagala okubivumula nga obukulembeze bwa Makerere University Convocation buzulira ddala ebyo ebisumbuwa abantu ababakwatako obuterevu nga babinogera eddagala nga kino kyekyoleka amakulu g’obukulembeze bwabwe era ekibafuula abawanguzi.
Oweek Mayiga akubiriza ekibiina kye Makerere kino okukuunga bamemba babwe okusosowaza obuwangwa bwabwe nga tebakiriza babagya ku mulamwa naddala mu mpadiika nga batereza ebyo ebyasoba kuba obudde tebunayitta nnyo kuba ebyo byebimu ku bibasigaza ku mirandira gyabwe nga bannaUganda era ebibafuula abenjawulo.
Kammalabyonna yeyamye nti bakukolagana ne Makerere University Convocation okulaba nti ensonga ez’omuzzinzi zitukirizibwa naddala ez’okuyitimusa abavubuka kuba ly’eggwagga ly’enkya.