Bya Samuel Stuart Jjingo
Mengo – Kyaddondo
Oluwalo lw’ensimbi UGX90,321,250 lweluteeddwa abantu ba Ssaabasajja Kabaka okuva mu masaza; Buddu, Kyaggwe, Ssese ne banna Rotary aba Kampala Ssese islands nga lutikuddwa Minisita w’Abavubuka, Ebyemizannyo n’Ebitone Oweek. Robert Sserwanga Ssaalongo ku lwa Katikkiro Charles Peter Mayiga.
Oweek. Sserwanga abakubirizza okwetangira endwadde, okukeberebwa obulamu n’okufuna obujjanjabi mu budde kubanga bikulu nnyo mu kukuuma obulamu bw’abantu wakati nga ebizinga byetegekerera okufuna eddwaliro eritambulira ku mazzi.
Minisita Sserwanga agamba nti Obwakabaka bwa Buganda wansi w’Ekitongole kya Kabaka Foundation bukubiriza abantu bonna okufaayo ku bulamu bwabwe, kubanga endwadde bwe zikwatibwa nga bukyali, omukisa gw’okuwona gweyongera.
Minisita Sserwanga asabye abaami ba Kabaka okusembeza abavubuka mu buweereza bwebalimu okusobola okuwewuka mu bukulembeze kubanga bbo bakyalina amaanyi okutambuza enteekateeka zino. Bwatyo abasabye n’okubateegeza ku lunaku lw’abavubuka omwezi ogujja ogwa Musenene.
Omugabe w’olunaku Omumyuka ow’Okubiri owa Ssekiboobo Mw. Fred Katende yeebazizza abaami okwetaba mu mpaka z’amasaza ez’omupiira n’abasaba okusigala nga bakuumye empisa okusobola okujjayo ekitiibwa ky’empaka zzino.
Omwami wa Kabaka ow’esaza Ssese Kweeba Oweek. Augustine Kasirye akubirizza abantu b’e Ssese obutemalira ku mulimu ogumu ogw’okuvuba wabula bateeke amaanyi mu kulima nga kino kijja kubayambako okubera n’ensimbi enkalu eziddabiriza awaka n’okulabirirawo.
Amasaza nga bwegakoze; Buddu:Mumyuka Kalungu – UGX 15,000,000 Musaale Butenga – UGX 5,000,000 Mut. XIV Malongo – UGX 3,870,000Mut. XX Bukakkata – UGX 8,060,000Mut. XIII Kisekka – UGX 6,500,000 Kyaggwe:Mut. Il Najjembe – UGX 4,190,000Mut. VI Kasawo – UGX 12,710,000Mut. V Nnyenga – UGX 4,690,000Ssese:Musaale Bubeke – UGX 1,400,000Ssaabaddu Mugoye – UGX 1,000,000 Omukolo guno gwetabiddwako Omubaka wa Palamenti akikirira Bukoto South Hon. Kizza Hakim Sawula, abaami b’eggombolola n’abalala.