Bya Stuart Samuel Jingo
Mitiyana – Singo
Omumyuka w’Omukubiriza w’Olukiiko lwa Buganda Oweek.
Ahmed Lwasa atuuseeko ku kitebe ky’e Ssaza Ssingo ku Matutuma e Mityana, mu kaweefube w’okunnyikiza engiri y’emirimo emikulu egy’olukiiko lwa Buganda n’okubangula abakulembeze b’Obwakabaka ku nzirukanya y’olukiiko, enkubiriza, enteesa, n’enkubaganya y’ebirowoozo.
Oweek. Lwasa eno gy’asinzidde n’asaba abakubiriza b’enkiiko ku mitendera gy’e ggombolola, emiruka, n’obutongole okwewala okutuuza enkiiko ezirwawo olwo abakiise basobole okwenyigira mu mirimu emirala.
Oweekitiibwa Ahmed Lwasa agamba eky’okutuuza enkiiko okumala obudde obuwanvu kabonero ka bunafu obulaga nti emiramwa egy’okuteesaako tegirambikiddwa bulungi era kiba kisaana okunogerwa eddagala mu bwangu ddala.
Takomye awo, Oweek. Lwasa era asomoozeezza abaami ba Kabaka ku nneeyisa y’abwe mu bantu, ku mikolo n’awalala, n’abakuutira okweyisa obulungi era bayambeko Mukwenda okutambuza emirimu gy’essaza n’okwongera ekitiibwa emirimu gy’Obwakabaka gye batambuza.
Mu buwufu bwe bumu, oweekitiibwa Ahmed Lwasa, asabye abaami ba Kabaka okukubiriza abantu bonna okulimira wansi w’enteekateeka ya Situla Omutindo nga batambuza buli kimu kye bakola okujjamu ensimbi.
Minisita wa Kabineeti, Olukiiko, Abagenyi n’Ensonga ez’Enjawulo mu woofiisi ya Katikkiro, Oweek.
Noah Kiyimba akunze abantu ba Kabaka okwettanira enteekateeka z’Obwakabaka ze bubasembereza mu Ssaza gaabwe okugeza; yinsuwa y’ebyobulamu, amasomero g’abaana abato aba nassale n’endala.
Omwami w’Essaza Ssingo Mukwenda, Oweek. Deogratious Kagimu yeebazizza nnyo Omukubiriza w’Olukiiko lwa Buganda olw’enteekateeka eno ye gy’asuubira nti egenda kuzza amaanyi mu bantu ba Kabaka batambuze obuweereza nga baggumidde.
Mu kulambula kuno, Omumyuka w’Omukubiriza w’Olukiiko lwa Buganda, awerekeddwako Ababaka b’Olukiiko ab’enjawulo; Oweek.
Andrew Mulwana Kizito, Oweek. Joseph Ddamulira Kawuma, Oweek. Kijjambu H R Stanley, Oweek. Eisah K. Mayanja, Mukasa Semei Peter, Oweek. Nyanzi Samuel, Omuk. David Ntege n’abaweereza abalala okuva mu Bwakabaka.