Bya Gerald Mulindwa
Bbaale – Buddu
Bazzukulu ba Namugera Kakeeto ab’eddira Omutima Omuyanja, balamaze ku butaka bw’abwe e Bbaale e Buddu. Katikkiro Charles Peter Mayiga, nga naye muzzukulu mu Kika kino yeegasse ku bazzukulu banne mu kulamaga, n’asaba Abaganda okwemanyiiza okulamaga mu Kika okunyweza essiga ly’obumu mu Bika nga bwekiri mu b’e nzikiriza ya Abakatoliki, n’abasiraamu bwe balamaga e Rome ne Mecca.
Katikkiro akikaatirizza nti obukulu bw’e Bika tebuseebengerera era ekisinga obukulu kwe kukola nga amatoffaali agaazimba obwakabaka bwa Buganda.
“Enju ne bwogisiiga langi, amatoffaali bwegabiririra langi ebambukako, awonno ffe abaganda gye tukoma okwagala Kabaka gye tulina okwongera okusukkulumya obukulu bw’ebika gye tuva”, Oweek Mayiga bw’ategeezezza
Kamalabyonna Mayiga asinzidde wano n’akowoola abantu bonna mu Buganda okwongera amaanyi mu nsonga z’Ebika byabwe, bawe Ab’Obusolya ekitiibwa, bakuume obutaka bwammwe, era bazimbe ebitebe ky’Ekika.
Ku nkulaakulana gy’alabye e Buddu, Katikkiro asanyuse okulaba emisiri gy’e mmwanyi n’ensuku, amayumba amalungi mangi gazimbiddwa, bongedde omutindo ku mmwanyi. Wabula olw’ekyeya ekisusse, abasabye basime enzizi bafukirire ebirime by’abwe, abalimi abaliraaliganye beegatte bafukirire wamu bataase ebirime by’abwe. Yebazizza gavumenti okutuusa amasannyalaze e Bbaale era n’agisaba ne mu bitundu ebirala egatambuze gatuuke mu bitundu byonna kireetewo enkulaakulana.
Omukulu w’Ekika ky’Omutima, Omutaka Namugera Kakeeto Nicholas Kasekende, ku nsong y’okuzimba ekitebe e Mutundwe, asabye Katikkiro Mayiga abaweeyo olunaku lumu buli ssabbiiti, buli lunyiriri lukiike ewa Katikkiro baleete ejjamba okuzimba ekitebe kyabwe, mu ngeri eyefaanaanyirizaako oluwalo.
Bazzukulu ba Namugera Kakeeto, eno beesonzeemu obukadde obusobye mu 9 mwenda, zigende ku mulimu gw’okuzimba ekitebe ky’Ekika ky’Omutima e Mutundwe Kyaddondo.
Abamu ku Bazzukulu ba Namugera Kakeeto, abakiika mu lukiiko lwa Buganda, beetabye mu kulamaga kuno okulo; Oweek Damas Mulagwe, Pookino Oweek Jude Muleke, Oweek Robert Bbaale Mugera, bannaddiini n’abantu abalala.