Bya Pauline Nanyonjo
Mmengo-Kyaddondo
Loodi Mmeeya wa Kampala omuggya Ssaalongo Ronald Balimwezo akiise embuga okuloopa obuwanguzi bwe eri Katikkiro oluvannyuma lw’okuwangula akalulu k’obwammeeya wa Kampala mu Gatonnya wa 2026, ono era azze n’okufuna okuwabulwa okwenjawulo okuva embuga ku butya ekibuga bwe kyanditambuzidwa.
Katikkiro Charles Peter Mayiga asinzidde mu nsisinkano eno ne yebaza abakulembeze ba Kampala ne gavumenti yonna olw’emirimu gye bakola mu kibuga okuli okuzimba enguudo, okuzimba obutale n’ebirala kyokka asabye nti mu lugendo lw’okukutereza ekibuga baleke kwonoona bintu bya basubuzi wabula babalambike ku butya bwe balina okukola.
“Njagala nnyo okubebaza emirimu gye mukola, omanyi kyangu nnyo okunenya abantu so kitukabiriza okwebaza abantu kale mwebale emirimu gye mukola okuli okututereeza enguudo, okuzimba obutale kuba abantu mu Uganda twafuna ekyejjo mu nkola y’emirimu nga buli kimu tukikola nga bwe twagala naddala okuyingira ku makubo” Katikkiro Mayiga.
Katikkiro asabye abakulembeze ba Kampala obutafeebya bubonero bwa Kampala n’ebyafaayo ebwenjawulo nga bakoppa ebibuga ebyakula nga wano abajjuliza akasolo Empala omwabbulwa n’erinnya ly’ekibuga ekikulu, bano abasabye okuggyayo amakulu g’ebintu ebyo mu bubonero n’ebibumbe bye bakozesa mu KCCA.
Oweek Mayiga anokoddeyo ku bizibu eby’embagirawo ebisaanidde okukolwako nga okussaawo entambula ey’olukale eya bbaasi ezisobola okukendeeza ku kalipagano k’ebidduka mu Kampala, okussaawo enkola y’amadduuka okuba n’epipa omusuulibwa ebisaaniko wamu n’okubakubiriza obutafulumya ebyamaguzi bye batuunda nga sukaali kuba kikolwa kya bukugu.
Kamalabyonna taleseeyo kulambika bannabyabufuzi n’abakozi emirimu gya kikugu ku ntambuza y’emirimu nga bakwatagana okukulaakulanya abantu be bakulembera nga n’abantu ba Kampala kye batunuulidde y’empeereza ennungi kyokka ebyo bisobola kutuukibwako singa bakwatagana ne baggyawo obutamanya obutali bumu nga bogerezeganya.
Loodi mmeeya wa Kampala Ssaalongo Ronald Balimwezo alaze nti yakozesa buvumu bwamanyi okwesimbaawo ku kifo kya meeya wa Kampala kale nga obuwanguzi bwe, ngule nnene okuva ewa Katonda kuba yatisibwatisibwa nnyo nga avudde ku kifo ky’obubaka bwa palamenti.
Meeya Balimwezo anyonyodde nti obukulembeze bwe wakubutambuliza ku nkolagana ennungi ne bakozi banne aba KCCA awatali kugugulana kwonna kuba amanyi emirimu gye nga meeya era wakukolagana nnyo ne Ssenkulu wa KCCA okusobola okuggusa emirimu gya Kampala kale abo abataagala nkolagana yabwe abasabye waddeyo abasoma etteeka lya KCCA. Asabye Katikkiro okukunga Obuganda okwenyigira mu kulongoosa ekibuga kuba abakiwangaliramu be basinga okukikyafuwaza naye singa bannenyigira mu nteekateeka ezigundidwawo enkyukakyuka ey’omugundu yakulabibwa mu Kampala.
Ssenkulu wa Kampala Capital City Authority (KCCA) Hajjat Sharifa Buzeki alaze nti Buganda gwe mutima gwa Kampala mwe bakolera nga balina ebanjja okulaba nti bateekako enkulakulana ey’omugunddu eyamba abantu ba Buganda. Mu nkola empya ey’okuyonja ebitundu bya Uganda, kul lwa KCCA Hajjat Buzeki asabye Katikkiro okukunga abantu okwenyigira mu bulungibwansi gwe batuuma ‘Weyonje’ ono wamu n’okwongera okutambula nabo mu kusengula abakozi b’omubutale nga bazimba obubya obutukagana n’omutindo.
Ensisinkano eno yetabidwako ba minisita ba Kabaka abenjawulo, ba meeya ba dizoni ezenjawulo ezikola Kampala, ba Kansala ba KCCA wamu ne famire ya meeya Balimwezo.