Bya Musasi Waffe
Ssabasajja Kabaka Ronald Muwenda Mutebi II asiimye emirimu egikolebwa ekitongole kyamawanga amagatte [United Nations] ekikulemberwa Ssabawandiisi Antonio Gueterres olwokussa essira mukulwansi okwonoona kwo’butonde bwensi. Mu bubakabwe obwetikiddwa Maama Nnabagereka Sylvia Nagginda mulukungaana olukwata ku kuuma obutonde bw’ensi olumanyiddwa nga, “Global Landscapes Forum’’ oluyindidde mukibuga Accra mu Ghana, Kabaka yategeezezza nti okukyukakyuka kw’embeera y’obudde sikwakukosa bantu bwokka wabula nabuli kirina obulamu kyonna. Kabaka yagambye nti ng’abakulembeze bennonno, bakola omulimu gwamannyi mukukuuma obutonde bw’ensi. Wano yanokkoddeyo Abaganda abalina emiziro 54 nga gino okusingiraddala bisolo, biwuka oba ebimera nga era abo ababyeddira babikuuma butiribiri. Omutanda era yasiimye enkolagana ebitongole by’amawanga amagatte nga United Nations Environment Program, United Nations Development Program, Food and Agricultural Organization, United Nations Children Fund, n’ebirala gyebirina n’obwakabaka n’agamba bagenda genda mumaaso n’okulwanirira obutonde bwensi.
Mububakabwe, Maama Fremah Osei Opare eyakiikiridde Pulezidenti Nana Akufo-Addo, yategeezezza nti abakulembeze ba Africa kumitendera egy’enjawulo bateekeddwa okukwatira awamu okusobola okulwanyisa enkyukakyuka y’embeera y’obudde. Ate ye omukulembeze w’ennonno oweggwanga lya ba Ashanti mu Ghana, Asante Hene Otumfuo Nana Osei Tutu II, nga yakiikiriddwa omu kubakungube, Adu Mensel, yategeezezza nti kyetaagisa okuyamba abantu babulijjo abayonoona obutonde okwejja mubwavu. Nnabagereka e Ghana yawerekeddwako oweekitiibwa Mariam Nasejje Mayanja, Minisita w’ettaka, bulungi bwansi, obulimi, n’ebitongole by’obwegassi.