Bya Pauline Nanyonjo
Mmengo-Kyaddondo
Olukiiko lw’abavubuka ba Buganda ttabamiruka (Buganda Youth Council) luyisizza ebiteeso bina (4) mu lutuula lwa lwo olubadde mu Bulange e Mmengo.
Ebiteeso ebiyisiddwa bye bino; 1. Abavubuka okwetaba mu kujaguza amazaalibwa ga Kabaka age myaka 71.
2. Okutongoza enteekateeka y’omuvubuka yoyoota eggombolola okutandika nga 4/06/2026 mu Kyaddondo.
3. Okukunga ebibiina by’abavubuka bonna okwewandiisa mu Buganda Youth Network.
4. Okusaba Gavumenti okuta abavubuka abasibibwa ku lw’ensonga z’ebyobufuzi oba batwalibwe mu mbuga z’amateeka bawozesebwe ku misango gye bazza.
Minisita w’abavubuka mu Bwakabaka Owek. Robert Serwanga Ssaalongo asinzidde mu lutuula luno n’akubiriza abavubuka okunyiikira okusalira ebizibu ebibatunulidde amagezi basseewo enkyukakyuka ey’omuggundu.
“Obuvunanyizibwa bwe mulina ssi butono naye okubeera omukulembeze omulungi kuva mu kufaayo nnyo ku bantu abakwetolodde n’okukola obutaweera ng’olwanyisa ebizibu bye basanga kyokka gwe bw’ofuuka ekizibu eri abantu abakwetoolodde oba toli mukulembeze, omukulembeze tewetunuulirira na kwesaasira wabula olina kuddamu bintu ebisoomooza abantu abakwetolodde” minisita Serwanga bw’alambise abavubuka.
Owek. Serwanga akubirizza abakulembeze bano obutakaabakaaba bizibu kuba embeera bwetyo bweri naye bafeeyo eri bannaabwe nga tebabasuulirira mu mbeera yonna bafube okumanya ebizibu ebibaluma.
Minisita Serwanga asabye abavubuka okugoberera amateeka agafuga ensi yabwe Buganda n’eggwanga Uganda baleme kweyinula nti balina abanene be bamanyi olw’obuweereza bwe balimu, ono abalaalise nti ye mu nsonga z’abamenyi b’amateeka tataliza muntu we n’atali bw’atyo abasabye bafube okukuuma empisa begombese bato baabwe obuweereza bwe mbuga.
Omukiise w’abavubuka mu lukiiko lwa Buganda Owek. Rashid Lukwago asiimye abakulembeze b’abavubuka mu Buganda olw’obutazikiza mu nkola ya mirimu nga enjogera y’ennaku zino bw’eri kyokka amagezi g’abawadde kwe kulambulagana beyigireko mu mirimu egyenjawulo gye bakola obuweereza bubanyumire.
Omukwanaganya w’abavubuka mu Bwakabaka Owek. Hassan Kiyemba akubirizza abakulembeze b’abavubuka okuba n’obukulembeze obwetongodde kisobozese emirimu gyabwe okutambula obulungi wamu n’okwanguya emirimu gye bakola.
Abakiise babiri mu lukiiko luno okuli Nakandi Liziiki Nakato okuva e Kyaddondo ne James Kaana Ssebuguzi okuva e Busujju be basembye ebiteeso ebyo okussibwa mu nkola.