Bya Gerald Mulindwa
Enteekateeka za Ttabamiruka wa Buganda Bumu European Convention 2026 zitambula bukwakku.
Ssentebe w’enteekateeka era omumyuka w’omubaka wa Kabaka mu Rhinelands Muky. Linda Ssekayita, akulembeddemu banne bwe bali mu nteekateeka ne basisinkana Minisita abatwala ow’ensonga za Buganda ebweru n’okulambula kwa Kabaka Oweek Joseph Kawuki ne bamwanjulira ebituukiddwako mu kiseera kino n’ebyo ebisigaddeyo okulaba nga wetutuukira mu mwezi gwa Muzigo nga buli kimu kijjiddwako engalo.
Minisita Joseph Kawuki abalungamizza ku birina okussibwako essira mu nteekateeka nga bijjayo ekifaananyi ekirungi ekya ekitiibwa kya Buganda. Abeebazizza enteekateeka ennungi eriwo mu kiseera kino ssaako n’okujja embuga okufuna okulungamizibwa okw’enjawulo.
Ensisinkano yeetabiddwamu Oweek. Samuel Ssekajugo Musoke – Omubaka wa Ssaabasajja Kabaka mu Ssaza Rhinelands, Oweek. Mugenyi Nelson Omubaka wa Ssaabasajja Kabaka mu Ssaza Sweden/Scandinavia, Mw. Frank Kyambadde okuva e Bugirimaani era Omuwandiisi w’olukiiko oluteekateeka Ttabamiruka, ne Ssamula Robert Omukwanaganya w’ensonga za Buganda ebweru.
Ttabamiruka wa Buganda Bumu European Convention 2026 wa kuyindira mu Bugirimaani mu kibuga Berlin mu mwezi gwa Muzigo.