Bya Moses Lutaaya
Wamala – Busiro
Katikkiro Charles Peter Mayiga asaasidde ab’enju ya Fredrick William Ssali omugenzi kati olw’okuviibwako omuntu waabwe. Ono nga Taata w’omuweereza mu Bwakabaka Ruth Namuddu.
Obubaka bwa Katikkiro busomeddwa Omukubiriza w’Olukiiko lwa Buganda, Oweek. Patrick Luwaga Mugumbule akulembeddemu abaweereza b’Obwakabaka abeetabye mu kuwerekera omugenzi.
“Amawulire g’okufa kwa Taata Fredrick William Ssali gatutuuseeko era ne tunyolerwa wamu nammwe. Kitalo nnyo banaffe. Tubasaasidde nnyo olw’okuviibwako omuntu ono abadde ow’omugaso ennyo gye muli.” Katikkiro Mayiga.
Katikkiro agamba nti wakati mu kukungubaga, kikulu okwebaza Omutonzi olw’obulamu bw’awadde omugenzi obwamusobozesa okukola emirimu gyonna gy’akoze ku nsi, omwali n’okuweereza Obwakabaka bwe ng’Owoomuluka Ssaabawaali, Wamala, okumalira ddala ebbanga. Ategeezezza nti ono obuweereza bwe yabutuukiriza bulungi okutuusiza ddala bwe yanafuwa.
“Ssali yayagala nnyo Kabaka we, era nga mujjumbize mu nteekateeka z’Obwakabaka. Awonno tumwebaza okuweereza Kabaka we.” Katikkiro Mayiga.Mu
Mu ngeri ey’enjawulo asaasidde nnyo omuweereza w’Obwakabaka, Ruth Namuddu, olw’okuviibwako taata we, era ne yebaza omugenzi olw’okumusigamu ensigo ey’okwagala Kabaka we, ate naye n’amuweereza butereevu mu Gavumenti ya Kabaka emyaka egisoba mu 20 kati. Agamba nti tewali kubuusabuusa nti taata yakola kinene okumuteeekateeka ng’omuweereza w’Obwakabaka.
“Ntuusa okusaasira okuvudde mu Gavumenti ya Ssaabasajja Kabaka, okwange n’ab’omu maka gange, eri bamulekwa, abooluganda n’abemikwano olw’okufa kw’omuntu ono abadde ow’omugaso ennyo.Ku ludda olulala, tusaasidde nnyo Omutaka Mugema, olw’okuviibwako muzzukulu we abadde ow’omugaso mu kika ky’Enkima.” Owek. Mayiga.
Obubaka bwe Katikkiro abukomekkerezza nga yebaza Katonda olw’obulamu bwa Fredrick William Ssali era n’amusaba agumye abasigaddewo mu kaseera kano akazibu ate n’omwoyo gw’omugenzi agulamuze kisa.
Omugenzi aziikiddwa mu Busiro, era eno abaweereza b’Obwakabaka ab’enjawulo okuli; Omuwandisi owenkalakkalira mu woofiisi ya Katikkiro Omuk. Josephine Nantege, akulira abakozi, Namala Josephine, n’abalala babddewo okugumya muweereza munnaabwe n’okuwerekera omugenzi.