Bya Miiro Shafik
Mmengo – Kyaddondo
Minisita Noah Kiyimba akowoodde abantu ba Buganda bonna buli omu okubaako ky’akola ekiri mu busobozi bwe okugaatta ku kaweefube w’okuzza Buganda ku ntikko.
Owek. Noah Kiyimba, ye Minisita wa Kabineeti, Olukiiko, Abagenyi n’ensonga ez’enjawulo mu woofiisi ya Katikkiro, okwogera bino abadde mu Bulange e Mmengo mu kutikkula oluwalo okuva mu bantu ba Kabaka abavudde e Ssingo ne Buddu.
“Olugendo lw’okuzza Buganda ku ntikko lwa mitendera era buli muntu alina ekkatala ly’alina okutuukiriza mu kaweefube ono, ssi bya balalal kulowooza nti ebyo tebitukwatako tubirekere Katikkiro, wabula ffenna buli omu akola ekiri mu busobozi bwayo” Minisita Kiyimba.
Owek. Kiyimba akubirizza Abaami ba Kabaka okujjumbira okukiika embuga okufuna obubaka bwe balina okutuusa ku bantu ba Beene, olwo babakunge okujjumbira enteekateeka z’Obwabakabaka n’okuwagira ebiruubirirwa ekikulu eky’okuzza Buganda ku ntikko.Mu
Minisita Kiyimba aliko n’obubaka bw’asibiridde abazadde mu biseera by’oluwummula lw’abaana engeri gye balina okubayisaamu; “abazadde tubasaba mu luwummula luno abaana mubawe eby’okukola baleme kubeera ku masimu na zi IPad, agamba nti bikosa abaana; bangi bafuna endwadde abalala bakozesa ebiragalalagala, n’ebintu ebirala.
Owek. Kiyimba asabye abazadde bakozese oluwummula okubangula abaana baabwe mu by’emikono, babayigirize obuwangwa n’ennono zaabwe, olulimi lwabwe, babalingamye ne kunkozesa ennungi eya tekinologiya n’emitimbagano.
Ye Minisita wa Gavumenti ez’Ebitundu Owek. Joseph Kawuki asinzidde wano n’alabula abantu ba Buganda okwegendereza abantu be bassaamu obwesige okubakulembera, abakubirizza mu biseera bino eby’akalulu, basengejje abo abanatuusa ensonga zaabwe era abategeera ensonga za Buganda. Ono akuutidde n’abantu okwegendereza bye balaba ku mitimbagano, basookenga kubisengejja n’okusunsula abo ababiteekayo.
Minisita Kawuki akubirizza abantu okwongera okunyiikirira enteekateeka eziggyayo obwagazi bwabwe eri Kabaka, era abeebazizza olw’okuwaayo oluwalo entakera, amakula n’enteekateeka endala. Ono era alabudde ku bulwadde bwa mukenenya ng’agamba nti newankubadde ebibalo biraga nti mu Buganda bukendedde, kyokka ebitundu nga Kyotera bikyalina okusoomoozebwa.Akuutidde
Akuutidde abantu okwongera okubeera obulindaala naddala nga bagoberere ebiragiro by’abasawo, ng’abakyala okuzaalira mu malwaliro, abalwadde okumira eddagala, abantu okwekebeza n’ebirala.
Omubaka wa Mityana North Kibedi Nsegumire naye omu kw’abo abakiise Embuga, yebazizza Obwakabaka olw’obuweereza eri abantu ba Uganda, asiimye eddwaaliro eryazimbibwa e Busimbi, ne yebaza n’engeri gye baanirizibwamu Embuga. Asuubiza okwongera okuwagira emirimu gy’Obwakabaka.
Abaami b’eggombolola bonna baliko bye baloopye Embuga, omuli obujjumbize bw’abantu mu mirimu gy’Embuga okweyongera, Abantu abakiise embuga bavudde mu ggombolola; Musaale Bulera (ssaza Ssingo) ne Mut. I Buwunga, Mut. IV Kyebe, Mut. I Katwe ne Mut. XVII Nabigasa (Ssaza Buddu) wamu n’essomero MUMSA High School – Mityana leero be bakiise Embuga, bano omugatte baleese ensimbi ezisobye mu bukadde 51 okuwagira emirimu gy’Obwakabaka.
