Bya Miiro Shafik
Mmengo – Kyaddondo
Obwakabaka bwa Buganda busse omukago ne UNICEF, ekitongole ky’ekibiina ky’amawanga amagatte ekikola ku ddembe ly’abaana nga bano essira baliteeka ku byobulamu bw’omwana, ekuza ye, n’ebyenjigiriza.
Katikkiro Charles Peter Mayiga ajjulidde omukago guno oguteereddwako omukono akulira ekitebe kya UNICEF mu Uganda, Dr. Robin Nandy wamu ne Minisita w’enkulaakulana y’abantu mu Buganda Owek. Choltilda Nakate Kikomeko.
“Obwakabaka tulina enteekateeka engazi mu byobulamu, Kabaka Mutebi II azze akubirizza abantu okugemesa abaana, okubaliisa obulungi, n’okubawa ebyenjigiriza ebirungi, Nnaabagereka ng’ayita mu kisaakaate naye afubye nnyo ku nkuza y’omwana ng’ateeka essira ku buntubulamu” Katikkiro Mayiga.
Katikkiro agamba nti omukago guno gulaga nti aba UNICEF basiima enteekateeka z’Obwakabaka mu baana, era agamba nti Obwakabaka bujja kwongera u amaanyi okulaba nti omukago guno guvaamu ebibala.
Owoomumbuga ategeezeza nti abaana abato n’abavubuka ba nkizo nnyo mu nkulaakulana y’eggwanga era y’ensonga lwaki Ssaabasajja Kabaka abasoosowaza nnyo mu nteekateeka ezikyusa embeera zaabwe z’abangawo.
Minisita w’enkulaakulana y’abantu mu Buganda Owek. Choltilda Nakate Kikomeko nga ku lw’Obwakabaka y’atadde omukono ku ndagaano eno, ategeezeza nti Obwakabaka bwanirizza n’obwetegefu bungi okutuukiriza ebigendererwa by’endagaano eno okugatta ku ddimu ly’Obwakabaka lye bwatandikako edda okutumbula enkuza ennungi mu baana.
Ye Dr. Robin Nandy akulira ekitebe kya UNICEF mu Uganda agamba nti olw’okuba Buganda ky’ekitundu ekisinga omuwendo gw’abaana abato mu Uganda, baakiraba nga Kya nkizo nnyo okukola omukago guno, ono yebazizza amaanyi Buganda geteeka mu kulaba nti abaana balabirirwa n’okukuzibwa obulungi era agamba nti omukago guno gugenderera okunnyikiza ebyo Obwakabaka bye bwatandikako edda.
Dr. Nandy agamba nti baakukwatagana n’Obwakabaka okulwanyisa omuwendo gw’abaana abatasoma, abawanduka mu masomero, n’okufuba okulaba nti abaana bafuna ebyobulamu ebirungi era bakule bulungi.
Omukago guno gulungamiziddwa ekitongole ky’Obwakabaka ki Buganda Investments and Commercial Undertakings Limited (BICUL)