Bya Miiro Shafik
Mmengo – Kyaddondo
Minisita Joseph Kawuki alabudde ku mpisa z’abaana mu biseera by’oluwummula olusembedde.
Eggwanga liri mu kiseera ng’abayizi bamaliriza ebigezo byabwe mu bibiina eby’enjawulo omuli n’abakola eby’akamalirizo ku mitendera egy’enjawulo omuli aba P7, S.4 ne S.6 ate nga n’abalala bakola ebibaggya mu kibiina ekimu okudda mu kirala. Oluvannyuma lw’olusoma luno olw’okusatu abayizi bagenda mu luwummula olugenda okubeera oluwanvu.
Mu mbeera eno, Owek. Joseph Kawuki, Minisita wa Gavumenti ez’Ebitundu, Okulambula kwa Kabaka n’Ensonga za Buganda Ebweru asinzidde mu Bulange e Mmengo ku mukolo gw’oluwalo n’asaba abazadde, abasomesa, abaana na buli akwatibwako okufaayo okulaba ng’abaana babeera n’empisa mu biseera by’oluwummula.
“Abaana njagala okusaba nga muwummudde muleme kulowooza nti muvudde mu kkomera mubeere nga embuzi evudde ku muguwa nga ekutudde, bwe mudda ewaka mutambulire kw’ebyo ebibadde bibagambibwa abasomesa musobole okudda ku masomero nga muli mu mbeera nnungi lwe mujja okutuuka ku buwanguzi mu bulamu bwammwe” Minisita Kawuki.
Minisita Kawuki era asabye abazadde mu mirimu emingi gye balina , obuvunaanyizibwa obungi n’emikolo bafuneyo obudde okugatta eddoboozi lyabwe ku ly’abasomesa okulaba nga baluŋŋamya abaana basigale nga bakwatiddwa mu mbeera ennungi nga bwe kibeera ku ssomero.
“Tukizudde ffe ng’abasomesa nti abazadde tebalina bumanyirivu kulabirira baana baabwe ennaku zino, era twakiraba nnyo mu biseera by’omuggalo gwa lumiimamawuggwe abaana bangi baayononeka era kyali kiseera kya kugezesa bazadde” Minisita Kawuki.
Owek. Kawuki wano akalaatidde abazadde obutaleka baana baabwe kwonooneka mu kiseera kya luwummula wabula bagatteko kw’ebyo ebibasomesebwa ku masomero nabo bafune ekisinga obulungi mu baana baabwe.