Bya Miiro Shafik
Nakivubo – Kyaddondo
Ssaabasajja Kabaka Ronald Muwenda Mutebi II Asiimye n’akwasa Essaza Buweekula ekikopo kyalyo ekisookedde ddala mu mpaka z’omupiira gw’Amasaza.
Obuganda bubuganye essanyu Kabaka Mutebi II bw’alabiseeko e Nakivubo ku mupiira oguggaddewo empaka z’omupiira gw’Amasaza 2025, nga zino ze z’omulundi ogwa 21 bukya zitandikibwawo mu 2004. Beene mu kisaawe yayaniriziddwa Katikkiro Charles Peter Mayiga era Asiimye n’awuubira ku bantu be bw’abadde yakatuuka ku kisaawe.
Olunaku oluggalawo empaka z’omwaka 2025 lubaddeko emipiira ebiri; Kyaggwe mweyakubidde Bugerere ggoolo emu eyateebeddwa Julius Kasule Kato, eno yabasobozesezza okukwata ekifo eky’okusatu era ne baweebwa obukadde 7 n’emiddaali ate Bugerere ekutte ekyokuna n’efuna obukadde 5.
Omupiira ogwokubiri era ogw’akamalirizo wakati wa Ssingo ne Buweekula, guwedde 1-0 Alex Taremwa bw’ateebedde Buweekula ggoolo ebawadde obuwanguzi bw’ekikopo Kya 2025 era kye basoose okufuna mu byafaayo. Buweekula bakwasiddwa Ekikopo, emiddaali n’ensimbi obukadde 12 ate Ssingo ekutte ekyokubiri eweereddwa obukadde 9 n’emiddaali.
Katikkiro Charles Peter Mayiga mu kwogerako eri Bannamawulire oluvannyuma lw’omupiira guno, atenderezza omutindo gw’omupiira ogwoleseddwa Buweekula ne Ssingo era ayozaayozezza Buweekula okuwangula ekikopo kyabwe ekisookedde ddala ne yebaza Ssingo n’amasaza gonna olw’empisa ezoleseddwa.
Ategeezezza nti ng’oggyeko okusiiwuka empisa okwali e Buvuma nga mu mupiira gwe nzannya ne Bugerere wamu ne Butambala okuggya abasambi mu kisaawe ng’omupiira tegunnaggwa, emipiira egisigadde gitambudde bulungi.
Katikkiro akubirizza Bannabyamizannyo okukuuma empisa kiyambeko emizannyo okukula mu Uganda, kubanga gigatta abantu, gitumbula ebitone ate givaamu ensimbi eri abagyetabamu.
Ye Minisita w’Abavubuka Emizannyo n’Ebitone Owek. Robert Serwanga Ssaalongo yebazizza abantu bonna abatadde ettofaali ku mpaka z’omwaka guno okuba nti ziwedde bulungi omuli; abazannyi, abawagizi, abavujjirizi, abakulembeze ba ttiimu, Abaami b’Amasaza n’enkiiko zonna ezikoze ne Minisitule mu kuggusa emirimu egy’enjawulo mu mpaka zino.
Ye Rogers Mulindwa, Ssentebe wa Bboodi y’olukiiko olukulembera ekisaawe ky’e Nakivubo ategeezeza nti bafunye essanyu lya nsusso nnyo okukyaza Kabaka mu kisaawe e Nakivubo omulundi ogusoose bukya kiddaabirizibwa, era ategeezeza nti baakukola enteekateeka, ekisenge mw’alabidde omupiira okwongera okukiyoyoota bakituume n’erinnya eriggya mu kitiibwa kya Kabaka, kifuuke kino kya kijjukizo.
Emipiira 104 gye gizanyiddwa mu mpaka z’omwaka guno, ggoolo 177 ze ziteebeddwa era Kalema Jimmy omuzannyi wa Buweekula y’asinze okuteeba ne ggoolo 7, era alondeddwa ng’omuzannyi asinze banne mu mpaka zonna. Byamukama Joel omukwasi wa ggoolo y’Essaza Ssingo ye mukwasi wa ggoolo asinze mu mpaka zonna.
Essaza Kkooki ly’essaza erisinze okwolesa empisa, Ssese ly’essaza erisinze okwolesa okulinnyisa omutindo mu kuzannya omupiira. Omwami w’Essaza Kyaggwe, Ssekiboobo Vincent Matovu Bintubizibu ye Mwami w’Essaza asinze okulaba emipiira emingi.Zino ze zibadde empaka z’omupiira gw’Amasaza ez’omulundi ogwa 21