Bya Miiro Shafik
Hotel Africana- Kyaddondo
Nga bweyafuuka enkola ya buli mwaka, leediyo CBS ng’eyita mu pulogulaamu ya Kaliisoliiso okutegeka ekyeggulo kya Kaliisoliiso ekisonderwako okusimbi okuddukirira enteekateeka ez’enjawulo.
Ekyeggulo ky’omwaka guno kyategekeddwa ku Hotel Africana, ng’ekigendererwa kikyali kya kumaliriza okuzimba waadi ku ddwaaliro e Nkozi ewatwalibwa abagudde ku bubenje ku luguudo lw’e Masaka.
Katikkiro Charles Peter Mayiga y’asinzidde ku kyeggulo kino n’alabula abantu abakozesa oluguudo mu ngeri ekyamu, nti kino kijja kubaviirako okufiira obulamu bwabwe nga bwekizze kirabika emirundi mingi ng’abantu bafiira ku kkubo olw’obulagajavu obw’enjawulo.
“Waliwo enjawulo wakati w’omuntu omulabufu n’omuntu omubuyabuya, ku luguudo, omulabufu avuga emisinde egiragiddwa, tavuga kidduka ng’atamidde, omulabufu avuga ekidduka ng’asibye olukoba, emmotoka agikola ‘service’, omulabufu bw’awulira ng’akooye awummula era tayogerera ku ssimu oba okuweereza obubaka eno nga bw’avuga; omulabufu teyeebyula ng’eno bw’avuga, era omulabufu omwana amutuuza mu mutto ogw’emabega ate era naye n’amusiba olukoba, obwo bwe bulabufu” Katikkiro Mayiga.
Katikkiro Mayiga wano w’asinzidde n’atongoza kaweefube eyatuumiddwa ‘Labuka – Tofiira ku kkubo’ ng’ono agendereddwamu okulabula abantu ku nkozesa y’ekkubo nga basomesebwa ku ndabirira ennungi ey’ebidduka, enkosea ennungi ey’oluguudo n’enteekateeka ez’enjawulo omuli n’okuvujjirira omulimu gw’okumaliriza waadi eno ey’e Nkozi ewatwalibwa abagudde ku bubenje.
Katikkiro yebazizza bonna abawagira enteekateeka y’okuzimba waadi eno, yebazizza abavujjirizi, abakulira CBS, abateesiteesi b’ekyeggulo, abaweereza ba Pulogulaamu ya Kaliisoliiso n’abantu bonna abawagira leediyo CBS nga bagiwa obulango wamu n’abo abawagira enteekateeka z’Obwakabaka ez’enjawulo.
“Bwetunaazimba waadi eno ne tugimaliriza, tunaaba tutadde ettofaali ddene nnyo ku nkulaakulana ya Uganda” Katikkiro Mayiga.
Ssentebe w’Olukiiko olutegesi olw’ekyeggulo kino era Omumyuka Owookubiri owa Katikkiro Owek. Robert Waggwa Nsibirwa yategeezezza nti omulimu gw’e Nkozi gwe baliko wegutuuse gunaatera okuggwa ng’agamba nti ku nsimbi ezisoba mu buwumbi 7 ezaabalirirwa okuguggusa, mu kiseera kino bafunye ezisukka ne mu kitundu kyazo.
Ono ategeezeza nti obwerufu, obwesigwa n’okukolera awamu biyambye nnyo omulimu guno okutambula obulungi era asabye abantu n’amakampuni okwongera okubawagira okulaba nga omulimu guno gugguka. Yebazizza olukiiko lw’akola nalwo emirimu era asuubizza nti baakufuba okulaba nga omulimu guno guggwa mu bbanga eritali lya wala, ate ekyeggulo kimwate ku nsonga endala.
Ssenkulu wa CBS leediyo, Omuk. Micheal Kawooya Mwebe ategeezeza nti abantu bangi abafiira mu bubenje era eno y’ensonga lwaki bawaayo pulogulaamu ya Kaliisoliiso okukulemberamu ensonga y’okulwanyisa obubenje ku nguudo nga bakubiriza abantu naye ate n’okutegeka ekyeggulo kino okutaasa abo ababeera babufunye. Ono naye yebazizza Bannamukago bonna abavuddeyo okukwatagana nabo ku nsonga eno.
Dr. Crescent Tuhumuhaise akulira eddwaliro lya Nkozi yebazizza nnyo abantu n’ebitongole abawagidde omulimu guno, era ategeezeza nti mu kiseera kino ekizimbe kyava dda mu musingi, ebisenge bisituse biri waggulu era ensimbi ezongerwa ku mulimu guno zikola omulimu munene nnyo ddala. Yebazizza aba Rotary abasuubiza okuwaayo ebyuma ebigenda okukozesebwa mu ddwaaliro lino.
Bannamukago aba Rotary nga bakulembeddwamu Pulezidenti wa Disitulikiti 9213 Rtn. Geoffrey Kitakule basuubiza okwongera okuwagira enteekateeka eno, era ono akikaatiriza nti olw’okuba ensonga eno egwa butereevu mu nteekateeka zaabwe nga Rotary bagiteekako amaanyi gaabwe gonna, era baakuteekamu ensimbi ezisoba mu kawumbi ku byuma ebigenda mu waadi eno.
Abavujjirizi aba MTN era nga be basinze okuteeka amaanyi mu kaweefube wa ‘Labuka – Tofiira ku kkubo’ bawaddeyo obukadde 520 ku kaweefube ono n’okuwagira omulimu gw’okuzimba waadi, ate Centenary Bank ewaddewo obukadde 280 ku nteekateeka eno y’emu n’abavujjirizi abalala abayise mu kugula emmeeza n’embeera endala.
Abantu abaakuŋŋanidde ku Hotel Africana basanyusiddwa abayimbi; ABA Afrigo Band, Vinka, Ava Peace, Elijah Kitaka, Fic Fameica ne Bannakatemba Madrat ne Chiko, ABA Tumbeetu, Maulana ne Reign n’abalala. Kyokka nabo ‘Bannakaliisoliiso Dinner’ beewadde enseko okuyita mu motto z’amaka, aka wakati n’akasembayo nga buli omu aleeta ekimuli ku birowoozo.
