Bya Miiro Shafik
Mmengo – Kyaddondo
Katikkiro wa Buganda Charles Peter Mayiga ajjukiza Obuganda buli omu okutuukiriza obuvunanyizibwa bwe mu lugendo lw’okuzza Buganda ku ntikko.
Bino Katikkiro abyogeredde ku Bulange e Mengo bw’abadde atikkula oluwalo okuva mu masaza; Buweekula, Butambala,Buddu ne Kyaggwe.
Katikkiro Mayiga ategeezeza nti enkola y’oluwalo yava dda ng’abantu baweebwa emirimu okugikola awatali musaala okugeza omuntu oba ekibinja basobola okutumibwa okubaako omulimu gwe bakola era ng’ekyo kye bakola kye kiyitibwa okutuukiriza oluwalo. Agamba nti Omulembe Omutebi bwe gwajja kwe kuzza enkola eno n’ekigendererwa eky’okuzuukusa abantu ba Nnyinimu okukomya okwekubagiza n’okwesaasira wabula banyiikire okukola okukyusa embeera zaabwe.
Owek. Mayiga ategeezeza nti Buganda nga bw’erinda Federo, abantu baayo basobodde okukola ebyo ebisitula ekitiibwa kya Buganda era agamba oluwalo y’emu ku nkola eziyitiddwamu okusitula Buganda mu byobulamu, ebyenjigiriza n’emirimu gy’Obwakabaka emirala mingi. Yebazizza Abaami Kabaka n’abantu ba Buganda abakola obutaweera Buganda okudda ku ntikko.
Minisita wa gavumenti ez’ebitindu mu Buganda Owek. Joseph Kawuki mu bubaka bwe asabye abantu mu bye bakola, bulijjo basookenga okwekebera, okwepima ku balala ababasingako era babalabireko wakati mu kuyaayaana okubafaanana n’okusingawo mu kukola eby’omutindo.
Akulembeddemu abakiise Embuga nga ye Mwami w’Essaza Butambala, Katambala Hajj Sulaiman Magala yebazizza abantu ba Buganda abawagidde emirimu gy’Obwakabaka okulaba nti gy’ongedde okuyitimuka n’okusitula ekitiibwa kya Buganda.
Eggombolola ezikiise Embuga ze zino; Mumyuka Bagezza, Musaale Nagojje, Ssaabaddu Ngando, Ssaabawaali Bulo, Mut. VIII Kasaali wamu n’ekitongole ky’abakyala okuva mu ssaza Kyaggwe. Bano omugatte baleese obukadde 43 n’emitwalo 20.