Bya Samuel Stuart Jjingo
Namboole – Kyaddondo
Tiimu y’eggwanga eya Uganda Rugby Cranes ekubiddwa tiimu y’eggwanga lya Kenya ku bugoba 32 ku 24 mu muzannyo oguguddewo empaka za Rugby Africa Cup Championship ezinyumidde abalabi mu kisaawe e Namboole nga zitandise olunaku olwa leero era zijja zikomekkerezebwa nga 19/8/2025.
Guno gwe mulundi ogw’okubiri ogw’omuddiringanwa nga Uganda etegeka empaka zino era ku mulundi guno empaka zeetabiddwamu ensi 8 okuli Uganda, Namibia, Zimbabwe, Senegal, Kenya, Algeria, Côte d’Ivoire, ne Morocco.
Bw’abadde aggulawo empaka zino, Omumyuka Owookubiri owa Katikkiro era Omuwanika w’Obwakabaka Owek. Robert Waggwa Nsibirwa ategeezezza nti ekifaananyi ky’emizannyo mu ggwanga kyongedde okuyitimuka era asabye bannayuganda okwongera okuwagira eby’emizannyo byonna mu ggwanga.
Ye Ssaabawandiisi wa National Council of Sports Dr. Benard Patrick Ogwel agambye nti empaka zino bazitaddemu ensimbi ezisoba obuwumbi 7 okulabira ddala nga zituukana n’omulembe ku mutendera gw’ensi yonna era yebazizza bannayuganda abazze mu bungi okuwagira eggwanga lyabwe. Abasabye obutaggwamu ssuubi olw’omuzannyo ogugguddewo, ttiimu ejja kwongera okutereerera.
Mu mipiira emirala egizannyiddwa Namibia ekyasinze okuwangula ekikopo kino emirundi egiwerera ddala 9 ekubye Senegal ku bugoba 50 ku 17, Algeria ekubye Côte d’Ivoire ku bugoba 41 ku 6, Zimbabwe ekubye Morocco ku bugoba 43 ku 8.
Empaka zino zikyagenda mu maaso nga ttiimu zongera okuttunka okulaba anabeera Nnantameggwa w’Empaka zino omwaka guno