Bya Samuel Stuart Jjingo
Abalimi abaatwalibwa Obwakabaka bwa Buganda mu Ggwanga lya Kenya bakomekkerezza olugendo lwabwe, oluvannyuma lw’okulambula n’okubangulwa ku bintu eby’enjawulo.
Bano batuuseeko mu bifo eby’enjawulo ebirimu ebyobulimi n’obulunzi eby’omutindo era olunako lwabwe olusembyeyo balumaliddeko mu kitongole kya KAlRO – Kenya Agricultural & Research Institute, eno gye basomedde ennima y’emmwanyi ey’omutindo era bakuutiddwa okusoosowaza okunoonyereza ku bulimi, olwo lwe banasobola okulima eby’omutindo kibayambe okufuna akatale baganyulwe mu bulimi.
Minisita w’Obulimi mu Buganda Owek. Hajj Amisi Kakomo agamba nti bakizudde nti tekinologiya n’obwegassi bitumbudde ekirime ky’emmwanyi mu ggwanga lya Kenya era kino kyetaaga okusomesa abantu ba Kabaka abalimi nabo baganyulwe mu nteekateeka nga eno. Ssenkulu wa Kabaka Foundation
Omuk. Eddie Kaggwa Ndagala ategeezeza nti abantu mu Buganda baategeera eky’okulima naye eky’okukola ekituufu kye kikyetaagisa okubayigiriza olwo basobole okufuna obulungi mu ntuuyo zaabwe. Era asuubiza nti ku magezi ge bafunye eno, bagenda kusomesaako n’abaasigadde eka.
Abalimi ab’enjawulo abafunye emisomo gy’okulima gino bagamba nti wakyaliwo omulimu munene nnyo okusitula n’okutumbula eby’obulimi mu ggwanga lyabwe, nga bajuliza kw’ebyo bye balabyeko ku bugenyi bwabwe bino e Kenya.