Bya Miiro Shafik
Mmengo – Kyaddondo
Empaka z’Omupiira gw’Amasaza ez’omulundi ogwa 21 zitongozeddwa ku mukolo ogutegekeddwa mu Bulange e Mengo.
Katikkiro Charles Peter Mayiga bw’abadde atongoza empaka zino, asabye bonna abeetaba mu mpaka zino omuli! abazannyi, ba ddiifiri, abategesi, abawagizi n’abalala okukulembeza omuzannyo mu byonna bye bakola, olwo empaka zongere okukula.
“Ebyemizannyo si kunyumirwa bunyumirwa kyokka, birimu emiganyulo mingi; abantu bazuula n’okukuza ebitone byabwe, bivaamu ensimbi, ettutumu, obumu, omusolo eri Gavumenti n’ebirala, ababirimu bateekwa okubeera abeesimbu nga boleesa empisa n’okwewala okwelogoza” Katikkiro Mayiga”
Kamalabyonna agamba nti Obwakabaka busoosoowaza nnyo ebyemizannyo olw’emiganyulo egibirimu era yebazizza bonna abavuddeyo okuwagira ebyemizannyo mu Buganda okutumbuka, omuli abavujjirizi, abategesi, abazannyi, abawagizi n’abalala.
Minisita w’Abavubuka Emizannyo n’Ebitone Owek. Robert Serwanga asinzidde wano n’asaba abantu buli muntu okuwagira omupiira gubeere ku ntikko olwo emiganyulo egigulimu gisobole okulabibwa, ategeezeza nti abazannyi abasoba mu 500 bamaze okuwandiisibwa okwetaba mu mpaka z’omwaka guno, era Amasaza geeteseteese nnyo okuvuganya obulungi mu mwaka guno.
Owek. Serwanga awadde ebibalo ku ngeri empaka gyezongedde okukula omuli omuwendo gw’abazigoberera okulinnya, abawagizi okweyongera mu bisaawe, n’abasambi ab’enjawulo okugenda mu liigi y’Eggwanga ne ku ttiimu y’eggwanga.
Ku lw’Omukubiriza w’Olukiiko lw’Abaamaza Owek. Ronald Mulondo atabaddewo, Owek. Sarah Nannono, ng’ono mwami wa Ssaza Mawokota yeyanzizza Ssaabasajja Kabaka Mutebi II olw’okuzza empaka z’Amasaza. Ono naye akubirizza empisa zikuumibwe abantu bonna abaneetaba mu mpaka zino, bakuume obumu, era bajjukire nti Kabaka ayagala nnyo ebitone by’abavubuka bitumbulwe mu mpaka zino. Bwatyo asabye abantu bonna okugoberera amateeka g’empaka zino, buli muntu asobole okuzinyumirwa.
Ku lwa Pulezidenti FUFA, Omwami Edgar Watson yebazizza enkolagana ya Buganda ne FUFA mu nteekateeka ez’enjawulo ezikuza omupiira gwa Buganda, asuubiza nti FUFA yakwongera okuwagira, okuyambako n’okukolagana n’Obwakabaka okutumbula empaka zino.
Omuk. Remmie Kisakye, Ssenkulu wa Majestic Brands ayanirizza abantu abatambula n’Obwakabaka mu mpaka z’Amasaza era ayanjudde abavujjirizi okuli; Airtel, Centenary, Plascon, Nivana, Uganda Breweries Limited, BBS TV ne CBS FM, UNAIDS ne Uganda AIDS Commission.
Omuk. Kisakye yebazizza Bannamukago bano olw’okuvaayo okuwagira abaana okukuza ebitone byabwe, agamba nti empaka zikuze okukuza ebitone ebigasa abantu bonna abaganda n’abatali okwetoolola Uganda yonna.
Ssenkulu wa Airtel Uganda agamba nti bbo nga Airtel beetegefu okugenda mu maaso n’okuwagira empaka zino ezisitula ebitone, Obumu, n’ebyenfuna bya Uganda, era asanyukidde nnyo Obwakabaka okubeera n’embalirira erinnya buli kiseera.
Omuk. Fabian Kasi, Ssenkulu wa Centenary Bank asiimye nnyo omukisa gwe baweebwa ng’abavujjirizi okuwagira empaka z’Amasaza, ono ategeezeza nti omwaka guno bagenda kuteeka obukadde 200 mu mpaka zino ate nga bakyawagira empaka zino nga bwekibadde n’emyaka 12 egiyise.
Empaka zino ezitongozeddwa zijja kuggulawo n’omupiira ku Lwomukaaga nga Bannantameggwa b’omwaka oguwedde aba Buddu bazannya Gomba ku Sports Arena Kitovu e Masaka mu Buddu.