Bya Ssemakula John
Masaka – Buddu
Katikkiro Charles Peter Mayiga atenderezza omulimu ogukolebwa Abasiisita Bannabiikira nga basomesa abakkiriza n’abaana, okubasigamu empisa nga babalyowa emyoyo wamu n’okubanyigiza mu mirimu egikulaakulanya.
Obubaka buno, Katikkiro Mayiga abuweeredde mu kigo Ky’AbasiIsita e Bwanda ku mukolo Sr. Mary Adeodate Nalukwago kwajaguliza emyaka 50 ne Bannabiikirwa abalala nebakuba ebiragaano eby’olubeerera okuweeraza Omukama ku Lwokusatu mu mmisa ekulembeddwamu Omusumba w’essaza lye Masaka, Serverus Jjumba.
Kamalabyonna Mayiga ayozaayozezza abajakugaza nabakubye ebiragaano olw’okwewaayo nebeeresa obufumbo ne basalawo okuweereza Katonda.
Katikkiro agamba nti bano tebakoma kulyowa myoyo kyokka, wabula bagunjula abantu mu mpisa ez’obuntubulamu nga babasomesa mu by’eddiini n’empisa ez’Ensi.
Owek. Mayiga agamba nti newankubadde ensangi zino waliwo abantu abasiiwuse empisa, naye abo be batono, kale n’asaba abasisita okugenda mu maaso n’omulimu ogw’ettendo gwe bakola, Ensi ejja kwongera okulongooka.
Owek. Mayiga mungeri y’emu asabye abakulembeze ku mitendera eggyenjawulo okwewaayo batuukirize obuvunaanyizibwa bwabwe okusinga okweswaza nga bakola ebitalimu nsa.
Bw’abadde ayigiriza, Omusumba Serverus Jjumba yeebaziza Ababiikira abakubye ebiragaano olw’okwewaayo okuweereza Omukama naabakubiriza okubinywererako mu mbeera yonna gyebasanga.
Omusumba Jjumba bwatyo akubiriza abantu obutaggwamu ssuubi newankubadde ensi ejjudde ebisoomooza naye bulijjo banywerere mu Katonda okusobola okubiwangula.
Nankulu w’Ekigo ky’ Ababiikira e Bwanda, Sr. Mother Noeline Namusoke abakubiriza Abasiisita abakubye ebiragaano okubinywererako olwo basobole okufuna empeera ebagwanidde.
Ye Omujaguza Sr. Mary Adeodate Nalukwago kulw’ Abajaguza b’olunaku yeebaziza nnyo katonda olw’okubalonda mu bangi bamuweereze, nebasaba abakiriza okwongera okubassa musaala.
Kitegeerekese nti Ababiikira abalala 7 bajaguza emyaka 60, abalala 3 n’ebajaguza emyaka 50 ate 6 nebajjaguza emyaka 25 bukyanga bakuba ebiragaano by’okuweereza n’okutambulira mu Mukama.
Omukolo guno gwetabiddwamu Abakkiriza mu biti ebyenjawulo okuli; Omumyuka Ow’Okubiri owa Pookino, bannabyabufuzi, bannadiini n’ abantu abalala.