Bya Gerald Mulindwa
Katwe – Kyaddondo
Katikkiro Charles Peter Mayiga asabye abayingira obufumbo batunuulire nnyo obuvunaanyizibwa bwabwe mu maka era babutuukirize okusinga okwesiba ku bitaliimu nga babanja okubawa ebitiibwa ebitagwanidde.
Obubaka buno Kamalabyonna Mayiga abuweeredde Katwe mu Kyaddondo ku kkanisa ya Uganda Martyr’s Church ku mukolo gw’okugatta abaweereza b’Embuga, Brenda Nakiwala ne Patrick Kajubi.
Mukuumaddamula Mayiga bano abawadde entanda naasaba Omwami okutuukiriza obuvunaanyizibwa bwe bwabeera ayagala okufuna ekitiibwa ekimugwanidde mu maka era tasuubira kino kuva ku ddoboozi ddene oba okubeera omuwanvu.
Abafumbo bano abasabye okufuba okuleeta essanyu mu maka ng’akola ebyo ebijjira mu buvunaanyizibwa bwe ng’okubeera omuyonjo, okufumbira omwami emmere ewooma, nokwewala okuyombayomba nti ekyo kigoba abasajja awaka, n’abakuutira okuba abakozi beekulaakulanye.
Bw’abadde agatta abagole bano, Rev. Canon Nelson Kaweesa ajulizza mu bigambo Petero bye yabuulira abantu abannyikira enjiri gyeyabuulira nebafuuka abagoberezi ba Kristo.
Abayozaayozezza okuyingira obufumbo obutukuvu nga batambulira mu buufu bw’ebbaluwa ya Petero, n’abasaba obufumbo babukwate nobwegendereza baleme ku bulagajjalira era basseewo okuwuliziganya.
Omukolo gwetabiddwako; Omukubiriza w’Olukiiko lwa Buganda, Oweek Patrick Luwaga Mugumbule, Omuk. Roland Ssebuufu, Oweek Richard Kabanda, Omuk. Josephine Nantege, Omuk. David Ntege, n’abaweereza b’Obwakabaka ku mitendera egy’enjawulo.
Brenda Nakiwala aweerereza mu kitongole kya Buganda Investments and Commercial Undertakings, ate Kajubi Patrick muweereza mu Gavumenti ya Kabaka.