Bya Shafik Miiro
Nkokonjeru – Kyaggwe
Obwakabaka bwa Buganda bweggase ku ekkelezia okujjukira ‘Mother Kevin’ omu ku Baminsani abajja kuno ne balekawo enkulaakulana ez’enjawulo. Omukolo gubadde ku kigo kya ‘The Little Sisters of St. Francis’ e Nkokonjeru mu Kyaggwe.
Omumyuka Owookubiri owa Katikkiro Owek. Robert Waggwa Nsibirwa wano wasinzidde n’asoomooza abakulembeze okubaako bye bayigira ku mukyala ono gw’agambye nti yakola nnyo okukyusa embeera z’obulamu bw’abantu ba Buganda, Uganda ne Africa ez’omwoyo n’ezobulamu obwa bulijjo.
“Okujjukira Maama Kevina kya nsonga, kubanga bw’otunuulira Ensi yaffe kati, abantu bagenda mu bukulembeze ne batuuka kubuvaamu nga tebalina kye bakoze, Maama Kevina kya kulabirako nti bw’obeera mu bukulembeze obeera na buvunaanyizibwa era olina kuweereza sso ssi kunyumira mu kifo. Olina okuweereza abantu okolewo enkyukakyuka era oleke omukululo nga bwe tulaba ye bwe yakola, n’aleka omukululo mu byenjigiriza, mu byobulamu ne mu ddiini” Owek. Nsibirwa.
Asinzidde wano era n’ategeeza nti Obwakabaka bweggase mu kujjukira olunaku luno olw’ebyafaayo eby’enjawulo; Ssekabaka Muteesa I ye yayita Abaminsani okujja mu Uganda okubuulira enjiri, Maama Kevina yayagala nnyo okufiira n’okuziikibwa mu Uganda kyokka yafiira mu America mu 1957, era Ssekabaka Muteesa II ye yakola enteekateeka okukomyawo omubiri gwe n’aziikibwa kuno, ate n’okujaguza obulamu bwe mwe yakolera ebintu eby’amatendo bingi.
Owek. Nsibirwa era akulisizza ekigo kya ‘The Little Sisters of St. Francis’ okuweza emyaka 101 ky’agambye nti kya okwenyumirizaamu kya maanyi kubanga bitongole bitono mu Uganda ebiwangaala ebbanga lino lyonna, abeebazizza olw’okukunyweza omukululo gwa Mother Kevin era ku lw’Obwakabaka agasse eddoboozi ku ly’Ekkelezia erisaba Mother Kevin alangirirwe mu lubu lw’abeesimi.
Rev. Fr. Crezestom Maviiri y’akulembeddemu missa ku mukolo guno era naye atenderezza obuweereza bwa Mother Kevin n’akubiriza abantu okumulabirako batuukirize obuweereza bwabwe eri Katonda nga bakulembeza obumalirivu n’okwewaayo. Avvumiridde eky’abantu okwenyumya nga baliko bye bakoze n’abasaba okukikomya ng’agamba ntu Katonda abakoze ebirungi abeera abalaba, n’olwekyo tekyetaagisa muntu kwenyumyako mu balala.
Ku lwa Ssekiboobo Vincent Matovu, Omumyuka we Owookubiri Omw. Katende Fred akubirizza abantu ba Buganda ne Uganda okutambula obulamu obugasa nga ne oli ne bw’ava mu Nsi by’akoze bigasa abalala nga Mother Kevin bwe yakola.
Omukolo ogw’okujjukira Mother Kevin gutegekebwa buli mwaka era mu ngeri ey’enjawulo wabaddewo okusonda ensimbi ezinaayambako mu kuzimba ‘Mother Kevin Spiritual Center’ nga kino kifo ekiteekerwateekerwa ababiikira abawummudde, era Obwakabaka buwagidde omulimu guno n’ensimbi obukadde bubiri n’ekitundu (2,500,000/=)