Bya Shafik Miiro
Namirembe – Kyaddondo
Obwakabaka bwa Buganda butenderezza obuweereza bw’eyaliko Omulabirizi w’e Namirembe Rt. Rev. Bp. Samuel Balagadde Ssekadde aziikiddwa olwaleero.
“Mu bukulembeze bwe ng’Omulabirizi ebbanga lyonna lye yamala, omugenzi yateekawo empuliziganya n’enkolagana enywevu wakati w’Obwakabaka n’ekkanisa, yatuukibwangako buli nsonga era naye yatuukiriranga abakulembeze b’e Mengo mu mwoyo ogw’obwa sseruganda” Katikkiro.
Obubaka bwa Katikkiro busomeddwa Owek. Robert Waggwa Nsibirwa ng’ono ye mumyuka Owookubiri owa Katikkiro era ali mu ntebe ya Katikkiro Mayiga mu kiseera kino ali mu luwummula.
Ssaabasajja Kabaka Mutebi II bwe yali agattibwa ne Nnaabagereka Sylvia Nagginda, Omulabirizi Ssekadde yali Musaale nnyo mu nteekateeka zonna era ye yayambako Ssaabalabirizi Livingstone Nkoyoyo ng’akola omukolo guno ogw’ekitiibwa, era Katikkiro agamba nti omugenzi alese amabala ag’ebyafaayo ebirungi agoolekera ddala nti Buganda emubadde ku mutima.
“Tufiiriddwa nnyo omutabaganya w’abantu bonna, ab’eddiini ye n’abatali, abeekitiibwa n’abatali, abato n’abakulu. Abadde ayaayaanirwa nnyo buli lwe wabaawo okusobagana mu mbeera ez’obuntu era nga talemererwa kugonjoola mbeera” Katikkiro.
Asaasidde nnyo Nnamwandu Allen Ssekadde, bamulekwa, Omutaka Lwomwa olw’okufiirwa omuzukkulu, Obuganda n’Ekkanisa ya Uganda era asabidde Omugenzi Katonda amuwummuze mirembe.
Okusabira omwoyo gw’omugenzi kukulembeddwamu Ssaabalabirizi Stephen Kazimba Mugalu era ono atenderezza omugenzi olw’obukulembeze obulungi, ng’agamba nti abadde muluŋŋamya w’abaweereza bangi mu nsonga ez’enjawulo mu kiseera we yaweerereza mu kkanisa ate ne mu buwummuze, asinzidde wano n’akubiriza abantu okudda eri Katonda n’okuteekateeka obulungi obulamu bwabwe.
Ku lwa Gavumenti eya wakati, Ssaabaminisita Robinah Nabanja y’asomye obubaka bwa Pulezidenti Museveni mwe yebalizza omugenzi olw’okubeera empagi mu kuteekawo enkulaakulana ez’enjawulo mu kkanisa ya Uganda era asaasidde nnyo obukulembeze bw’Ekkanisa, Nnamwandu ne bamulekwa olw’okuviibwako omuntu waabwe.
Omugenzi Ssekadde asabiddwa e Namirembe mu Lutikko ebadde ekubyeko abantu omuli Bannaddiini, Abakulembeze mu Gavumenti ya Kabaka n’eya wakati, Maama Nnaabagereka, Abalangira n’Abambejja, bannabyafuzi ab’enjawulo n’abantu abalala era aziikiddwa ku biggya by’Abalabirizi ku lutikko e Namirembe.