Bya Shafik Miiro
Ssaabasajja Kabaka Ronald Muwenda Mutebi II asiimye n’aweereza obubaka obw’okusaasira eri ab’enju y’omugenzi Rt. Rev. Bp. Samuel Balagadde Ssekadde omulabirizi w’e Namirembe eyawummula ayafa ku bbalaza ya ssabbiiti eno nga 14 Mutunda
Nnyinimu obubaka abutisse Omulangira David Kintu Wasajja era abusomedde mu kkanisa e Namirembe ewabadde okusabira omwoyo gw’omugenzi. Asaasidde nnyo Nnamwandu Allen Ssekadde olw’okuviibwako munne gw’awangadde naye ebbanga eddene mu buweereza ne mu kuwummula, mu ngeri y’emu asaasidde ne bamulekwa olw’okufiirwa kitaabwe mu ngeri ey’amangu.
“Omugenzi tumumanyidde akaseera kawanvu, era we yabeerera omulabirizi w’e Namirembe yakolagananga bulungi n’Obwakabaka wamu ne Nnamulondo, abadde wa kisa, mwetowaze ng’awa buli muntu ekitiibwa, tumusaaliddwa nnyo” Kabaka Mutebi II.
Omuteregga yebazizza Katonda olw’obulamu bw’awadde Bp. Ssekadde ate n’obuweereza bw’amusobozesezza okukola, era amusabidde Mukama amuwummuze mirembe.
Okusaba kuno kwetabiddwamu Maama Nnaabagereka Sylvia Nagginda, Abalangira n’Abambejja, Omumyuka Owookubiri owa Katikkiro Owek. Robert Waggwa Nsibirwa, Omukubiriza w’Olukiiko lwa Buganda, Baminisita ba Kabaka, n’Abaami be ku mitendera egy’enjawulo.
Omugenzi aziikiddwa ku biggya by’Abalabirizi ku lutikko e Namirembe