Bya Shafic Miiro
Najjembe – Kyaggwe
Minisita w’Amawulire, Okukunga Abantu era Omwogezi w’Obwakabaka, Owek. Israel Kazibwe Kitooke alambudde amasomero g’Omumyuka Asooka owa Ssekiboobo, Owek. Moses Ssenyonjo Kiyimba agasangibwa mu ggombolola ya Mutuba II Najjembe e Kyaggwe.
Oweek. Kazibwe asookedde ku ssomero lya St. Mary’s College Lugazi gy’alambuziddwa emirimu egikolebwa mu ssomero lino nga era lye limu ku gasinga okuyisa abaana mu kitundu kino. Ayogeddeko eri olukiiko olukulembera abayizi baakutide okubeera abagumiikiriza kubanga ebirungi biri mu maaso.
Oluvanyuma, Owek. Kazibwe alambuziddwa essomero lya Mother Kevin College Mabira, gy’alambuziddwa n’ebidiba by’ebyenyanja ebirundibwa ku ssomero. Eno oluvannyuma atongozza yo ekibiina kya Nkobazambogo.
Owek. Kazibwe yebazizza omutandisi w’amasomero gano Owek. Ssenyonjo olw’obuweereza n’obuwulize eri Kabaka n’amwebaza n’olwokugunjula abaana b’Eggwanga.
Minisita awerekeddwako abakiise mu Lukiiko lwa Buganda olukulu okubadde Owek. Ann Kigudde, Owek. Sulaiman Daniel Ssempala, abakulembeze ba Nkobazambogo mu Uganda, abaami ab’eggombolola, abatongole n’abalala.