Bya Ssemakula John
Bulange – Mmengo
Minisita w’Obutondebwensi mu Bwakabaka Owek. Mariam Mayanja Nkalubo asabye Gavumenti eyongeze ku nsimbi zeteeka ku kukuuma Obutondebwensi mu mbalirira yaayo. Owek.Nkalubo agamba ensimbi entono eziweebwayo kyekimu ku byongedde ebikolwa by’okutyoboola obutonde.
Okwogera bino Owek. Mayanja abadde aggulawo omusomo gw’ abavubuka okuva mu Masaza agenjawulo ku butondebwensi mu Bulange e Mengo ku Lwokubiri. Owek. Nkalubo era asabye abavubuka okukozesa obulungi omulembe Ssaabasajja Kabaka gweyabakwasa nga bakuuma n’okutaasa Obutondebwensi.
Omukwanaganya w’Emirimu mu woofiisi y’Obutondebwensi, Teddy Nambooze Galiwango ategeezezza nti okubangula buno kwakuyamba abavubuka okumanya obukulu bw’okukuuma Obutondebwensi era babumanyise n’abalala.
Bbo abavubuka abeetabye mu musomo guno baweze okuteeka mu nkola byebayize okutaasa ebiseera bya Buganda ne Uganda ebyomu maaso.